Qashqadaryo viloyatining Qarshi tumanida yashovchi Dilnoza Rahmonova prokuror qaynotasi Xidir Karimovning o‘zboshimchaligi davom etayotganini, tuman prokurorining sud talabini bajarmasligiga mas’ullar ham jim qarab turganini aytmoqda. Bu haqda “Daryo” muxbiri xabar qildi.
Muxbir bilan suhbatlashgan Dilnozaning aytishicha, uning ikki nafar farzandi 2021-yilning 25-dekabr kuni prokuror qaynotasi tomonidan olib ketilib, haligacha qaytarib berilmagan. Qaynota sud qaroriga hurmatsizlik qilishda davom etmoqda.
“Men bolalarimni tortib olishgani, sud qarori talabi qo‘pol ravishda buzilayotgani haqida aytgandim. Bu holat ijtimoiy tarmoqlarda tarqalgach, mas’ullar — viloyat prokurori va respublika bosh prokurori ham voqeadan xabar topgan deb o‘ylayman. Ammo qonunni oyoqosti qilayotgan, sud qaroriga nisbatan hurmatsizlik qilgan prokuror qaynotamga hech qanday chora ko‘rilmadi. Bolalarim esa hamon mendan uzoqda”, — deydi bolalari tortib olingan ona.
Dilnoza Rahmonova prokuror qaynotasining o‘zboshimchaligiga nafaqat mas’ul tashkilotlar, Bosh prokuratura ham chora ko‘rmayotganidan ajablanayotganini bildirmoqda.
“Bosh prokuratura va mas’ul tashkilotlar tuman prokurorining qonunsizlikka yo‘l qo‘yayotganiga chora ko‘rishga ojizmi yoki prokuratura tizimida shunchalik tanish-bilishchilik ildiz otganmi?”, — deydi prokuror qaynotasidan jabr ko‘rayotganini ta’kidlagan kelin.
Bolalari tortib olingan Dilnoza Rahmonova qonunbuzilishi oddiy fuqaro tomonidan sodir etilsa, unga nisbatan jazo muqarrarligi ta’minlanishini, mansabdorlar, jumladan, prokuror qaynotasiga kelganda esa hamma jim qarab turganini tushunolmayotganini aytmoqda.
“Hayotda oddiy fuqaro qonunbuzilishiga yo‘l qo‘ysa, unga nisbatan tezda jazo muqarrarligi ta’minlanganini ko‘p ko‘rganmiz va eshitganmiz. Xo‘sh, mansabdorlarga kelganda, prokurorlarga kelganda nega bu qonunlarimiz oqsayapti? Nega aynan prokuror qilmishini fosh etish, unga chora ko‘rilishiga kelganda hamkasb sifatida hurmat qilish, ko‘zing, qoshing deya bir-birini ayash, uning aybini yopishga urinish kuzatilmoqda? Aynan Nishon tumani prokurorining aybini fosh qilish vaqti kelganda mas’ullar shunday yo‘l tutishmoqda”, — deydi prokuror tomonidan huquqi poymol bo‘layotganini aytgan fuqaro.
Dilnoza Rahmonova endilikda faqat Prezidentga, Prezident administratsiyasiga murojaat qilishga majbur bo‘layotganini aytmoqda.
“Men prezidentga, Prezident administratsiyasiga murojaat qilib, Nishon tumani prokurorining o‘zboshimchaligiga ko‘z yumib, uning aybini fosh qilishdan tiyilayotgan Bosh prokuraturaning xatti-harakatiga baho berishlarini, O‘zbekistonda qonun barcha uchun barobar ekanini yana bir bor ko‘rsatib berishlarini so‘ragan bo‘lardim”, — deydi Dilnoza Rahmonova.
Eslatib o‘tamiz, avvalroq Qashqadaryoda tuman prokurori o‘z kelinidan uning ikki bolasini olib qo‘ygani, ayolga esa bu holat ustidan sudga murojaat qilish tavsiya etilgani haqida xabar berilgandi. Mazkur voqeaga munosabat bildirgan Bosh prokuratura axborot xizmati tuman prokurorining o‘zboshimchaligiga nisbatan xizmat tekshiruvi tayinlanganini, natija haqida ma’lumot berishini bildirgandi.
Izoh (0)