Gentra ва поезд тўқнашуви оқибатида ҳалок бўлган ҳайдовчи, Тошкентда тўқнашган 5 та машина. ЙТҲлар тафсилотлари

Ўзбекистон йўлларида содир бўлган бахтсиз ҳодисалар тафсилотларини тақдим этамиз.

Наманганда поезд ва Gentra тўқнашиши оқибатида 17 ёшли ҳайдовчи ҳалок бўлди

Йўл-транспорт ҳодисаси 2021 йил 29 декабрь куни соат 10:30 атрофида Наманган вилояти Поп тумани «Мағизор» маҳалласи ҳудудидан ўтган қўриқланмайдиган темир йўл кесишмасида содир бўлган. Шу туманда яшовчи фуқаро (2003 йилда туғилган) Gentra автомашинасида тўхташ белгисига амал қилмай ҳаракатлангани учун Тошкент вилояти Чиноз туманида яшовчи фуқаро (1983 йилда туғилган) бошқарувидаги шаҳарлараро поезд билан тўқнашган.

Оқибатда Gentra ҳайдовчиси олган тан жароҳатлари туфайли воқеа жойида ҳалок бўлган.

Ҳолат юзасидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан жиноят иши қўзғатилган.

Тошкентда 5 та машина иштирокида ЙТҲ содир бўлди

Тошкент шаҳри Миробод туманида 5 январь куни соат 20:30 атрофида Audi, «ВАЗ-2106», 2 та Matiz ва Damas автомобиллари иштирокида тўқнашув юз берди.

Оқибатда «ВАЗ-2106» ҳайдовчиси О.Б. (1978 йилда туғилган) ва Audi йўловчиси С.У. (1998 йилда туғилган)га тез тиббий ёрдам кўрсатилган.

ЙТҲ юзасидан Тошкент шаҳар ИИББ ЙҲХБ ходимлари томонидан суриштирув ишлари олиб борилмоқда.

Наманганда Lacetti уриб юборган пиёда вафот этди

Наманган вилояти Янгиқўрғон туманида 29 декабрь куни яна бир одам ўлими билан боғлиқ ЙТҲ содир бўлди. Шу куни соат 17:30 атрофида «Мўғол» маҳалласи ички йўлида Lacetti ҳайдовчиси (1997 йилда туғилган) ҳаракат хавфсизлигини таъминлай олмай, йўлни кесиб ўтаётган пиёдани (1980 йилда туғилган) уриб юборган.

Оқибатда пиёда тан жароҳатлари билан воқеа жойида вафот этган.

Ҳолат бўйича Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан жиноят иши қўзғатилган.

Жиззахда Жигули пиёдани уриб юборди

ЙТҲ 1 январь куни соат 19:30 атрофида Жиззах вилояти Шароф Рашидов туманида содир бўлган. «Туёқли» маҳалласида яшовчи фуқаро «ВАЗ-2102» машинасини «Обод» маҳалласи Ислом каримов кўчасида бошқариб бораётиб, йўл четида кетаётган пиёдани (1992 йилда туғилган) уриб юборган.

Оқибатда фуқаро ёпиқ серебрал травма, бош мия чайқалиши ва чап оёқ тўпиқ суяги синиши ташхиси билан шифохонанинг жонлантириш бўлимига ётқизилган.

Ҳозирда ҳолат юзасидан терговга қадар текширув ҳаракатлари олиб борилмоқда.

Яна Жиззахда яна Жигули пиёдани уриб юборди

Ҳолат 3 январь куни 22:30 атрофида вилоятнинг Зарбдор туманида содир бўлган. Фуқаро «ВАЗ-2103» машинасини «Ойбек» маҳалласида бошқариб бораётиб, йўлни кесиб ўтаётиб «Тинчлик» маҳалласида яшовчи пиёдани уриб юборган.

Оқибатда жабрланувчи бош мия ёпиқ жароҳати, кома ҳолати ва чап елка суяги ёпиқ синиши ташхиси билан туман тиббиёт бирлашмасининг жонлантириш бўлимига ётқизилган.

Ҳозирда терговга қадар текширув ҳаракатлари олиб борилмоқда.