БМТнинг гуманитар масалаларни мувофиқлаштириш бошқармаси 2022 йил январига қадар Афғонистонда давом этаётган гуманитар инқирозни ҳал этиш учун 1,5 миллиард долларга яқин маблағ тўплади. Бу ҳақда БМТ бош котибининг матбуот котиби Стефан Дюжаррик маълум қилди.
Унинг сўзларига кўра, ушбу маблағлар қисман афғонларни қишга тайёрлаш, жумладан, нақд пул ва ноозиқ-овқат маҳсулотларини тўғридан-тўғри тақсимлашни қўллаб-қувватлаш учун сарфланган. «Ушбу ёрдам мамлакатнинг турли қисмларига кўрсатилган», — дея таъкидлайди Дюжаррик.
Шунингдек, унинг таъкидлашича, сўнгги кунларда Афғонистондаги гуманитар вазият мамлакатнинг кўплаб вилоятларига қор ёққани сабаб янада ёмонлашган. Қалин қор сабаб асосий йўллар ёпилиб қолган, шунинг учун керакли ёрдамни етказиб бериш қийинлашган.
Таъкидланишича, коммунал хизматлар техника ва ёқилғи етишмовчилиги сабаб йўлларни тозалашга улгурмаяпти.
Афғонистонда «Толибон» ҳокимият тепасига келгач, кўплаб афғон спортчилари қўллаб-қувватлаш ва маблағ етишмаслиги сабабли фаолиятини якунлашга мажбур бўлган. Афғонистон айни пайтда жиддий гуманитар инқирозга юз тутмоқда. Мамлакатда миллионлаб одамлар очлик ёқасида, озиқ-овқат, дори-дармон ва бошқа зарур маҳсулотлар етишмовчилиги ҳукм сурмоқда.
Аввалроқ Ўзбекистоннинг Афғонистонга юборган инсонпарварлик ёрдамини топшириш маросими бўлиб ўтгани, Хитой Афғонистонга 800 минг доза вакцина етказиб бергани, Жаҳон банки Афғонистонни қўллаб-қувватлаш учун 280 млн доллар маблағ ажратиши тўғрисида хабар берилганди.
Изоҳ (0)