Шимолий Корея 2022 йилда Пекинда ўтказиладиган Олимпиадада «душман кучларининг ҳаракати» ва коронавирус пандемияси сабаб иштирок этишдан бош тортди. Бу ҳақда Корея Марказий телеграф агентлигига таяниб, «РИА Новости» хабар берди.
«Биз Олимпиадада душман кучларининг ҳаракати ва пандемия сабаб иштирок эта олмаймиз, аммо хитойлик дўстларимизга дабдабали ва ажойиб Олимпиада фестивалини ўтказишда тўлиқ қўллаб-қувватлаймиз», — дейилади баёнотда.
Шимолий Корея ҳукумати АҚШ ва «уларнинг вассал кучлари»ни, уларнинг сўзларига кўра, Олимпиада ўйинларини муваффақиятли бузишга йўналтирилган ҳаракатларини қабул қилмаган. Пхеньяннинг фикрича, ушбу ҳаракатлар Олимпия хартияси руҳини ҳақорат қилади.
2021 йилнинг сентябрь ойида Халқаро олимпия қўмитаси КХДР Миллий олимпия қўмитасини 2022 йил охирига қадар «хартияни бузиш ва ўз мажбуриятларини бажармагани учун» четлатганди. Шимолий Корея жамоаси 2021 йилнинг июль–август ойларида Токиода ўтказилган ёзги Олимпиадада ҳам иштирок этмаган.
Эслатиб ўтамиз, 200 га яқин инсон ҳуқуқларини ҳимоя қилиш ташкилотлари Хитойда ўтказилиши керак бўлган 2022 йилги Олимпиадани бойкот қилишга даъват қилган эди. Бунинг сабаби Шинжон-Уйғур автоном вилоятида инсон ҳуқуқлари оммавий равишда бузилгани ҳақидаги хабарлар бўлиб, уларда миллиондан ортиқ мусулмон уйғурлар асирлик лагерларида сақланаётгани таъкидланган.
Буюк Британия Жамоатлар палатаси депутатлари ёзда ҳукуматни 2022 йили Пекинда ўтказиладиган Олимпиадада иштирок этишдан воз кечишга чақирган эди. Декабрь ойида эса АҚШ ва Австралия ортидан Британия ҳам Пекинда ўтказиладиган Олимпиада ўйинларига дипломатик бойкот эълон қилганди.
Изоҳ (0)