Қозоғистонга келган КХШТ (Коллектив хавфсизлик шартномаси ташкилоти) тинчликпарвар кучлари мамлакат ҳукуматига инқирозни енгишда ёрдам бермоқда. Бу ҳақда Қозоғистон президенти Қосим-Жўмарт Тўқаев халққа мурожаатида айтиб ўтди.
Тўқаев КХШТга аъзо давлатлар раҳбарлари, хусусан, Арманистон бош вазири, Беларусь, Тожикистон, Қирғизистон президентларига ташкилот орқали шошилинч ёрдам кўрсатгани учун миннатдорлик билдириб, айниқса, кўмак ҳақидаги сўровга «дўстона ва илиқ муносабат билдирган» Россия президенти Владимир Путинни алоҳида тилга олди.
Ўз нутқида Тўқаев Қозоғистондаги тартибсизликларда мамлакат халқининг асосий манфаатларидан йироқ бўлган «эркин оммавий ахборот воситалари ва хорижий арбоблар»нинг «шериклик ва гижгижловчи роли» борлигини таъкидлади.
«Муболағасиз айтиш мумкинки, бу масъулиятсиз демагогларнинг барчаси Қозоғистондаги фожиани юзага келтиришда шерик бўлган», — деди у. Президент мамлакат ҳокимиятига қарши ҳаракатларни нафақат «жангарилар», балки сохта маълумотлардан моҳирона фойдаланган ва одамларнинг кайфиятини бошқаришга қодир «мафкуравий қўпорувчилик учун махсус тайёрланган мутахассислар» ҳам уюштирганини таъкидлади.
«Афтидан, улар ягона қўмондонлик пункти томонидан шуғуллантирилган ва бошқарилган», — деди Тўқаев.
Мавзуга доир: «Қотиллар билан қандай қилиб музокара олиб бориш мумкин?» — Тўқаев «террорчиларга» қарши огоҳлантирмасдан ўқ узишни буюрди
Мурожаати давомида президент мамлакатда ҳозирча фақат «маълум ҳудудларда» ва «маълум вақт оралиғида» интернетга уланишни тиклаш тўғрисида қарор қабул қилганини айтди. Бундан ташқари, ҳудудлардаги фавқулодда ҳолат тартиби келгусида босқичма-босқич бекор қилинади.
Тўқаев Қозоғистон тарихидаги «қора кунлар» тез орада ўтиб кетишига ишонч билдирди.
Қозоғистонда 2 январь куни газ нархи кескин ошиши сабабли оммавий норозилик намойишлари бошланиб, бир неча кундан сўнг улар полиция билан қуролли тўқнашувларга айланиб кетди.
Мамлакатдаги кескинлик муносабати билан Тўқаев КХШТ (Коллектив хавфсизлик шартномаси ташкилоти)га мурожаат қилиб, ёрдам сўради. Ташкилот чекланган муддатга республикага тинчликпарвар контингент юборди.
Қозоғистондаги тартибсизликлардан кўрилган зарарнинг умумий миқдори, тахминий ҳисоб-китобларга кўра, 91 миллион долларни ташкил этмоқда, шундан 89,8 миллион доллари Олмаотага тўғри келади.
Изоҳ (0)