ОАВ: Токиода қор ёғиши оқибатида 200 дан ортиқ одам жабрланди

Токиода қор ёғиши оқибатида 215 киши жабрланди. Бу ҳақда тез ёрдам хизматига масъул бўлган пойтахт ёнғин бўлимига таяниб, «РИА Новости» хабар берди.

Kyodo агентлигининг ёзишича, таркибига тўртта префектура кирадиган Токио ҳудудларида музламалар сабаб йўлларда камида 1021 та йўл-транспорт ҳодисалари содир бўлган. 7 январь тонги ҳолатига кўра, автомагистраллардаги 10 дан ортиқ участкалар музлама ёки авариялар сабаб ёпилган.

Токиога кеча ёғган қор ҳали эримаган. Қатор туманларга 10 сантиметргача қор ёғган. Япония пойтахти учун бу кам учрайдиган ҳодиса — охирги марта қор 2020 йилнинг мартида ёғган, ўтган кунги каби қор эса охирги марта 2018 йилнинг январи ва 2014 йилнинг февралида ёғгани айтилмоқда.

«ТАСС» маълумотларига кўра, 6 январь куни Токиодаги кучли қор сабаб 60 га яқин ички авиарейслар бекор қилинган. Шунингдек, кучли қор Япония шарқида, жумладан, Сидзуока ва Канагава префектураларида кузатилган.

Декабрь охирларида Японияда кучли қор ёғиши оқибатида транспорт ҳаракати тўхтади, минглаб оилалар электр таъминотисиз қолган эди. Ўшанда Аомори префектурасида 200 сантиметр, Киото, Нагоя ва Хиросимада ҳам кўп миқдорда қор ёғган.