Самарқандда 3 млн сўм иш ҳақини бермаган маҳалладошини пичоқлаб ўлдирган шахс 13,5 йилга қамалди

Самарқанд шаҳрида хизмат ҳақини бермаган маҳалладошини ўлдирган шахсга суд ҳукми ўқилди. Бу ҳақда Zarnews хабар қилди.

Маълум қилинишича, икки шахс ўртасидаги низо 2021 йил июль ойида бошланган. Судланувчи С.А. шаҳардаги Фарҳод қўрғонида яшовчи Ф.Д.дан унинг уйида таъмирлаш ишларини бажаргани учун хизмат ҳақи талаб қилган. Ф.Д. эса унга бошқа пул бермаслигини айтган. Ҳолат ўзаро жанжалга сабаб бўлган.

Орадан кўп ўтмай С.А. маҳалладошининг яшаш уйига келиб, уни уйидан ташқарига чақирган. Орада яна жанжал юзага келган. С.А. ўзи билан олиб келган ошхона пичоғи билан унинг чап кўкрак соҳаси, чап кўкрак ён орқа соҳаси қисмларига бир неча марта уриб тан жароҳати етказган. Ф.Д. олган тан жароҳатлари оқибатида воқеа жойида вафот этган.

Жиноят ишлари бўйича Самарқанд шаҳар суди С.А. га 13 йил 6 ой муддатга озодликдан маҳрум қилиш жазосини тайинлади.