Қозоғистон президенти Қосим-Жўмарт Тўқаевнинг айтишича, газ нархини пасайтириш талаби билан норозилик намойишига чиққан Манғистов вилояти аҳолиси мулоқотга тайёрлигини намойиш қилиши керак. Муаммо юзасидан тузилган ҳукумат комиссиясига эса республика барқарорлиги манфаатларидан келиб чиққан ҳолда «ўзаро мақбул ечим» топиш топширилди.
Дам олиш кунлари Манғистов вилоятининг Жанаўзен ва Ақтау шаҳарлари аҳолиси суюлтирилган газ нархини пасайтириш талаби билан норозилик намойишига чиққанди. Ижтимоий тармоқлардаги хабарларга кўра, аҳоли газ нархини 120 тенгедан (0,27 доллар) 60 тенгега (0,13 доллар) туширишни талаб қилган.
«Ақтауда ҳукумат комиссияси иш бошлади, унинг таркибига президент маъмурияти ходимлари киради. Республика оператив штаби доимий асосда ишламоқда. Комиссияга мамлакатимиздаги барқарорлик манфаатларидан келиб чиққан ҳолда юзага келган муаммонинг ўзаро мақбул ечимини топиш топширилди. Ҳуқуқ-тартибот органларига жамоат тартибининг бузилмаслигини таъминлаш бўйича кўрсатмалар берилди. Намойишчилар масъулият ва мулоқотга тайёр бўлиши лозим», — деб ёзган Қозоғистон президенти Twitter’да.
Аввалроқ Тўқаев топшириғига кўра Манғистов вилоятидаги вазиятни кўриб чиқиш учун ҳукумат комиссияси тузилган эди. Шунингдек, вилоятдаги норозилик намойишлари фонида Олмаота шаҳридаги марказий Республика майдони ёпиб қўйилгани хабар қилинганди.
Изоҳ (0)