Гаити бош вазири Aриэль Анри мамлакат мустақиллигининг 218 йиллигини нишонлаш пайтида унга қарши уюштирилган суиқасддан омон қолди. Бу ҳақда VTV телеканалига таяниб, «РИА Новости» хабар берди.
«Гонаив шаҳри соборида отишма юз берди: камида бир киши ҳалок бўлди, бир неча киши жароҳат олди. Гаити бош вазири жабрланмади», — дейилади телеканал сайтида.
ОАВ хабарларига кўра, ҳудудда фаолият юритаётган қуролли тўда Гаити раҳбарини Гонаивда «қорасини кўрсатмаслик» ҳақида огоҳлантирган.
Суиқасддан сўнг ҳукумат 1804 йил 1 январда Гаитининг Франциядан мустақил бўлганини нишонлаш учун режалаштирилган бошқа тадбирларни бекор қилди.
Эслатиб ўтамиз, Гаити президенти Жовенел Моиз 2021 йилнинг 7 июлига ўтар кечаси қуролли ҳужумчилар томонидан ўз қароргоҳида отиб ўлдирилганди. Ҳодисада президентнинг рафиқаси ҳам оғир жароҳат олган, аммо у АҚШга олиб кетилиб, тиббий ёрдам билан ҳаёти сақлаб қолинган.
Бир мунча вақт ўтгач, прокурор судьядан президентнинг ўлдирилиши бўйича Aриэль Анрига қарши айбловлар қўйишни талаб қилди. Унинг даъвосига кўра, бош вазир ва асосий гумондорлардан бири Жозеф-Феликс Бадю президент ўлдирилган куни телефон орқали гаплашгани тасдиқланган. Кейинроқ Aриэль Анри прокурорни лавозимидан четлатди.
Изоҳ (0)