Путин ва Байден телефон орқали суҳбатлашди. Бу уларнинг 1 ой ичида иккинчи мулоқоти

Россия президенти Владимир Путин ва АҚШ президенти Жо Байден 30 декабрь куни телефон орқали мулоқот қилди. Бу ҳақда Кремль баёнотига таяниб, Meduza хабар берди.

Қайд этилишича, суҳбат 50 дақиқа давом этган.

Россия президенти ёрдамчиси Юрий Ушаковнинг айтишича, Путин ва Байден Москванинг хавфсизлик кафолати бўйича талабларини муҳокама қилган. Икки давлат президентлари Россиянинг АҚШ (9—10 январь кунлари Женевада), НАТО (12 январдан Брюсселда бошланади) ҳамда Европа Хавфсизлик ва ҳамкорлик ташкилоти (13 январдан Венада бошланади) билан ўтказиладиган учрашувида бу борадаги музокараларни давом эттиришга келишиб олган.

Суҳбат чоғида Путин, агар Россия чегаралари яқинида ҳужум қуроллари жойлаштириладиган бўлса, мамлакат АҚШ тутган йўлни қўллашини таъкидлади. У, шунингдек, ваъда қилинган аксилроссия санкцияларининг жорий этилиши Россия ва Ғарб ўртасидаги муносабатларнинг тўлиқ узилишига олиб келишини аниқ қилиб айтди. Путиннинг сўзларига кўра, бу хатолик бўларди, деди Ушаков.

Байден АҚШ Украинада ҳужум қуролларини жойлаштиришни режалаштирмаётганини айтган. Икки давлат президентлари мулоқотни Янги йилдан кейин ҳам давом эттиришга келишиб олди, дея қўшимча қилди Путиннинг ёрдамчиси.

Владимир Путин ва Жо Байден ўртасидаги мулоқот Ғарбнинг Россия ўз қўшинларини Украина чегарасида тўплаётгани ва Украинага ҳужумни режалаштираётгани ҳақидаги баёнотлари ортидан кучайди.

Аввалги музокаралардан сўнг Россия АҚШ ва НАТОга хавфсизлик кафолатлари бўйича талабларини тақдим этганди. Улар орасида Украинани НАТОга қабул қилмаслик талаби ҳам бор.