Тошкентда Миллий гвардия ҳарбийлари учинчи қават деразасида осилиб қолган 4 ёшли боланинг ҳаётини сақлаб қолди

Тошкентда Миллий гвардиянинг ҳарбий хизматчилари тўрт ёшли болани қутқариб қолди, дея хабар бермоқда «Подробно».

«27 декабрь куни соат 14:40 да Тошкент Миллий гвардиясининг тезкор гуруҳи ходимлари Яшнобод туманида навбатчилик қилаётиб, 22-сонли ҳарбий шаҳарча уйларидан бирининг деразаси темир панжарасига тиқилиб қолган 4-5 ёшли болани кўриб қолган. Бола ёрдамга чақираётган бўлган», — дея қайд этди Миллий гвардия матбуот хизмати.

Ходимлар дарҳол яқин атрофда турган Ободонлаштириш бошқармасининг махсус автомашинасини чақириб, учинчи қаватдаги темир панжара орасида осилиб турган болани қутқариб олган.

Кейинчалик маълум бўлишича, боланинг онаси ўша пайтда ишда бўлган. Болакай соғ ва саломат ўз оиласига топширилган.