Tarix fanlari nomzodi, taniqli tarixchi olima va arxeolog Margarita Filanovichning ta’kidlashicha, Toshkent shahar hokimligi 2021-yilda poytaxtdagi mashhur Shoshtepa yodgorligini ta’mirlashni va’da qilgan bo‘lsa-da, ishlar hali ham boshlanmagan. Bu haqda “Podrobno.uz” xabar qildi.
Filanovich Shoshtepa yodgorligini tadqiq qilib, Toshkentning yoshi 2200 da ekanini aniqlagan va uning kashfiyoti O‘zbekiston poytaxti yubileyini nishonlashga asos bo‘lib xizmat qilgandi.
“Shoshtepa, Mingo‘rik, Oqtepa. Bu yodgorliklarni qutqarish, rekonstruksiya va muhofaza qilish kerak. Shoshtepa yodgorligining yarmi noqonuniy qurilayotgan uy-joylarning tebranishi tufayli qulab tushdi va vayrongarchilik davom etmoqda. Hokim va’da bergandi, ya’ni konservatsiya bo‘ladi, yodgorlik chegaralanadi, deb aytgandi. Biz loyihani tayyorladik, u ko‘p marta ko‘rilib, imzolandi. Noyabr oyida menga loyiha uchun texnik vazifani olib kelishdi. Loyiha 2021-yilda boshlanib, shu yilda tugashi kerak edi. Ammo dekabr oyi ham kelibdiki, ishlar boshlangani yo‘q”, — deydi Margarita Filanovich.
Ekspert yodgorlik qishda yana qor va yomg‘ir ostida qolishidan ogohlantirgan: “Bu ilm-fan va jamoatchilik nuqtayi nazaridan jinoyatdir. Nima qilish kerak o‘zi?!”
Qayd etilishicha, loyiha amalga oshirishi kerak bo‘lgan korxonada tegishli litsenziya mavjud emas.
“Hech qaysi poytaxtda 2000—2200 yillik yodgorlik yo‘q. Bu yerda esa ‘stolba’ o‘rnatish uchun teshiklar qazishadi, bolalar kartoshka pishiradi!”, — deya so‘zlarini yakunlagan Filanovich.
Izoh (0)