Кучли туман Ўзбекистондаги иккита аэропорт фаолиятини чеклаб қўйди

29 декабрь куни эрталаб Наманган ва Андижон аэропортларида кўриш имконияти ёмонлиги сабабли самолётлар учиш ва қўнишни амалга ошира олмади. Бу ҳақда Uzbekistan Airports компанияси матбуот хизмати хабар берди.

Кучли туман туфайли — кўриш масофаси 50 метр атрофида бўлган — «Урал» авиакомпаниясининг Қозондан парвоз қилаётган SVR2161 рейси соат 08:48 да Наманганга қўна олмаган ва Тошкентдаги захира аэродромига йўналтирилган.

Яна бир HY9620 рейси ҳам об-ҳаво шароити ноқулайлиги туфайли Наманганга қўнишни амалга ошира олмаган ва Фарғонадаги захира аэродромга юборилган.

Андижон аэропортида ҳам худди шундай ҳолат кузатилган. Uzbekistan Airways авиакомпаниясининг Москвадан HY-622/621 қатновини амалга оширган ҳаво кемаси ҳам соат 10:45 да белгиланган аэропортга қўна олмасдан, Фарғонадаги захира аэродромига учган.

Метеорология хизмати прогнозига кўра, ушбу аэропортлар об-ҳаво шароити туфайли, тахминан, соат 14:00 гача ёпиқ бўлади. Режалаштирилган барча рейслар энг яқин захира аэродромларга йўналтирилади.

Аввалроқ «Ўзгидромет» Ўзбекистоннинг аксарият ҳудудларида 30 декабрь куни ҳам туман тушиши мумкинлигини маълум қилганди.

Эслатиб ўтамиз, 24 декабрь куни Тошкентдан учадиган самолёт туман туфайли Андижонга қўна олмаганди.