Қашқадарё вилояти Китоб туманидан ўтган М-39 автомобиль йўлининг Тахтақорача довони 26 декабрь куни соат 11:00 дан вақтинча ёпилгани тўғрисида хабар берилганди. ИИВ ЙҲХББнинг маълум қилишича, ҳозирда тегишли чоралар кўрилиб, довондаги автомобиль йўли қордан тозаланган.
Таъкидланишича, айни вақтларда довон йўлида транспорт воситаларининг ҳаракатланиши учун рухсат берилган.
«Барча ҳайдовчилардан тезлик меъёрини оширмасдан, оралиқ масофани сақлаб ҳаракатланишларини сўраймиз», — дейилади хабарда.
Аввалроқ «Ўзгидромет» 26—27 декабрда А-373 Тошкент—Ўш автомобиль йўлининг Қамчиқ довони қисмида қор, вақти-вақти билан кучли қор ёғиши, туман тушиб, кўринувчанлик 50 метргача пасайиши, шамол тезлиги секундига 17-22 метргача кучайиши, йўлда қор уюмлари, яхвонлик ҳосил бўлиши кутилаётганини маълум қилганди.
Эслатиб ўтамиз, Қашқадарё ва Самарқандни боғловчи Тахтақорача довони қалин қор ёғгани сабаб 13 декабрь куни ҳам ёпилиб, 14 декабрда довонда автомобиллар ҳаракати қайта тикланганди.
Изоҳ (0)