Сирдарё вилоятида жойлашган Сардоба сув омборида юзага келган фавқулодда ҳодиса натижасида зарар кўрган ирригация ва мелиорация объектларини қуриш, таъмирлаш ишлари билан боғлиқ харажатлар учун бюджетдан 4,4 миллиард сўм ажратилди. Бу ҳақда Сирдарё вилояти ҳокимининг тегишли фармойиши қабул қилинди.
Қайд этилишича, ажратилган маблағдан 3 миллиард сўми Қуйи Сирдарё ирригация тизимлари ҳавза бошқармасига, қолган 1,4 миллиард сўми ҳавза бошқармаси ҳузуридаги мелиоратив экспедицияга ажратилиши кўзда тутилган.
Эслатиб ўтамиз, 2010—2017 йилларда 1,2 триллион сўм (Марказй банкнинг 2017 йил 1 январдаги курсига кўра 404,4 миллион доллар) эвазига қурилган, расмий ОАВ томонидан «аср қурилиши» деб эътироф этилган Сардоба сув омбори тўғонларидан бири 2020 йил 1 май куни ёрилиши оқибатида йирик сув тошқини юз берган эди. Кейинчалик ушбу ҳолат матбуот томонидан «аср фожиаси» дея таърифланди.
Сув омборидан фойдаланиш «Ўзбекистон темир йўллари» АЖга қарашли «Сардоба сув омбори объектларидан фойдаланиш ва ривожлантириш дирекцияси» томонидан амалга оширилган.
2020 йилнинг июль ойининг охирларида Бош прокуратура Сардоба сув омбори тўғонининг ўпирилиш сабабларини маълум қилди: лойиҳалашдаги хатоликлар, қурилиш жараёнида меъёрларга риоя қилмаслик, эксплуатация жараёнидаги хатоликлар.
Президент Шавкат Мирзиёев 2020 йилнинг 5 майида Сардоба фожиаси бўйича «барча айбдорлар қонун олдида жавоб бериши»ни айтди. 2021 йилнинг майида «Сардоба иши»да айбдор деб топилган 17 кишига суд ҳукми ўқилди.
Февраль ойида Қурилиш вазирлигининг Лойиҳа-қидирув ташкилотлари фаолиятини мувофиқлаштириш бошқармаси бошлиғи Насрулло Бобоев «Дарё» мухбири Мусулмонбек Иброҳимов билан суҳбатда Сардоба сув омбори қайта қурилиши, бу бўйича ҳукумат қарори қабул қилинганини маълум қилди. У объектда тиклаш ишлари икки босқичда амалга оширилишини, ҳолат қўшни давлатларга ҳам тааллуқли бўлгани боис илмий ўрганишларга нафақат маҳаллий мутахассислар, балки чет эл илмий-тадқиқот марказлари ҳам жалб қилинганини айтганди.
Изоҳ (0)