Афғонистонда «Толибон» ҳаракати Мустақил сайлов комиссиясини ҳамда Сайлов шикоятлари билан шуғулланадиган комиссияни тарқатиб юборди. Бу ҳақда Deutsche Welle хабар берди.
«Толибон» матбуот котиби Билол Каримийнинг таъкидлашича, бундай комиссияларнинг фаолиятига ҳеч қандай эҳтиёж йўқ.
Шунингдек, яқинда иккита вазирлик – тинчликни сақлаш ишлари ва парламент ишлари билан шуғулланадиган вазирликлар тугатилган.
Афғонистоннинг собиқ расмий вакили Ҳалим Фидай мамлакатдаги президентлик ва бошқа сайловларни назорат қилиб келган комиссиянинг тарқатиб юборилишини қоралади.
Август ойида ҳокимиятни эгаллаган «Толибон» ҳаракатининг юқори лавозимли аъзоси Ваҳидулла Ҳошимий Афғонистон демократик давлатга айланмаслиги, унда шариат қонунлари амал қилишини айтганди. Унинг сўзларига кўра, Афғонистонда ҳокимият тузилмаси «Толибон» ҳукмронлигининг аввалги даври: 1996—2001 йиллардаги давлат тузилишига ўхшаш бўлади.
Сентябрь ўрталарида «Толибон» Аёллар масалалари бўйича вазирликни тугатиб, унинг ўрнига Саховатни тарғиб қилиш ва иллатларни йўқотиш вазирлигини тузгани, декабрь ойида Афғонистон миллий армиясини шакллантиришга киришгани ҳақида хабар берилганди.
Изоҳ (0)