Зимбабве шарқида йўловчи ташишга мўлжалланган автобуснинг бензовоз билан тўқнашуви кўплаб қурбонларга олиб келди. Бу ҳақда мамлакат телерадиоэшиттириш корпорациясига таяниб, «Korrespondent.net» хабар берди.
Гувоҳларнинг сўзларига кўра, Хараредан Мутаре томон ҳаракатланаётган Betа компаниясининг автобуси қарама-қарши йўналишга чиқиб кетиб, бензовоз билан тўқнашув содир этган. Фақатгина етти кишини қутқариб қолишга муваффақ бўлинган.
Автобус ичида ўнлаб йўловчи бўлгани айтилмоқда. Уларнинг барчаси автобуснинг ёниб кетиши натижасида ҳалок бўлган. Таъкидланишича, қурбонларни шахсини аниқлаш учун суд-тиббиёт экспертизаси талаб этилиши мумкин, чунки айрим йўловчилар таниб бўлмас даражада ёниб кетган.
Аввалроқ Бангладешдаги паромда содир бўлган ёнғин оқибатида камида 30 киши ҳалок бўлгани, Мьянмада содир бўлган кўчки оқибатида 100 га яқин одам бедарак йўқолгани, Япониядаги кўп қаватли бинода содир бўлган ёнғин оқибатида 27 киши ҳалок бўлгани тўғрисида хабар берилганди.
Изоҳ (0)