Филиппинда содир бўлган Раи тайфуни қурбонлари сони 300 кишидан ошди. Бу ҳақда Хатарларни камайтириш ва табиий офатлар оқибатларини бартараф этиш миллий кенгашига (NDRRMC) таяниб, «РИА Новости» хабар берди.
Аввалроқ Филиппинда юз берган Раи тайфуни қурбонларининг сони 239 кишига етгани, 52 киши бедарак йўқолгани тўғрисида хабар берилганди. Ўз навбатида, Филиппин ҳукумати 156 киши ҳалок бўлгани ҳақида айтмоқда. Уларнинг маълумотларига кўра, 275 киши жароҳат олган, яна 37 киши бедарак йўқолган.
«Жума куни, Рождестводан бир кун олдин NDRRMC тайфун қурбонлари сони 326 кишига етганини маълум қилди. 661 киши жароҳат олган, 58 киши бедарак йўқолган деб ҳисобланмоқда», — дейилади CNN Philippines телеканали маълумотида.
Раи тайфуни Филиппин қирғоқларига 16 декабрь пайшанба куни етиб келганди. Ўн минглаб аҳоли мактаб ва ҳукумат биноларида жойлашган хавфсиз ҳудудларга эвакуация қилинган. Айрим одамларни мажбуран эвакуация қилишга тўғри келган.
Баъзи жойларда шамол тезлиги соатига 185 километрга етган, максимал тезлик соатига 195 километрни ташкил этган. Маҳаллий ҳокимият органлари ёмон об-ҳаво туфайли йўллар ва кўприкларга етказилган зарарни тахминан 178,4 миллион Филиппин песосига (3,56 миллион доллар) баҳолади.
Эслатиб ўтамиз, Филиппинда апрель ойида Суригай тайфуни содир бўлиб, 60 минг киши эвакуация қилинганди. Ўшанда шамол тезлиги 195 километр соатга етиб, уйларнинг томини вайрон қилган ва дарахтларни қўпориб ташлаган.
Изоҳ (0)