Bloomberg: Россия Украина чегаралари яқинида қўшин тўплашда давом этмоқда

Россия Украина билан чегара яқинида ҳарбий техника ва қўшинларини тўплашда давом этмоқда. Бу ҳақда Janes ҳарбий разведка компанияси томонидан ўрганилган сунъий йўлдош тасвирларига таяниб, Bloomberg хабар берди.

Bloomberg хабарига кўра, ноябрь ойининг бошидан бери чегара ҳудудларига танклар, артиллерия қуроллари ва ҳаво ҳужумидан мудофаа тизимлари кўчириб келинган. Чегарада қўшинлар сони чекланган бўлса-да, Россия поезд ва самолётларда катта қўшинларни жўнатиб, қуролли кучларини тезда йиғиши мумкин, дейди Janes вакиллари.

Украина ҳарбийларининг маълумотларига кўра, Москва аллақачон 122 минг ҳарбийни Украина билан чегарадан 200 километр узоқликда жойлаштирган.

Россия қўшинларининг Украина билан чегарада тўпланаётгани ҳақида маълумотлар 2021 йилнинг кузида пайдо бўлишни бошлади. Ғарб ОАВ манбаларига кўра, Украинага ҳужумда 100-175 минг россиялик аскар иштирок этиши мумкин. Кремль бу хабарларни «қуруқ, асоссиз ҳолда кескинликни кучайтириш» деб атади.

Украина атрофидаги вазият 7 декабрь куни Россия ва АҚШ президентлари Владимир Путин ва Жо Байден ўртасидаги онлайн музокараларда муҳокама қилинган эди. Байден Путинни Россия Украинага бостириб кирган тақдирда «кескин иқтисодий ва бошқа чоралар» ҳақида огоҳлантирган. Путин, ўз навбатида, НАТОни «Украина ҳудудини босиб олишга бўлган хавфли уринишлар»да айблаган ва альянснинг шарққа томон кенгайиши тўхтатилишига кафолат талаб қилган.

Бу орада Европада хавфсизлик кафолатлари бўйича музокаралар бошланди. Россия Ташқи ишлар вазирлиги АҚШ ва НАТО билан келишув лойиҳаларини эълон қилди. Россия томони бошқа нарсалар қатори НАТОга Украинани альянсга қўшилишдан четлаштиришни таклиф қилди. АҚШ Россиянинг таклифларини кўриб чиққанини, аммо Европа давлатларининг иштирокисиз уларни муҳокама қилмоқчи эмаслигини маълум қилди.