Жанубий Корея ҳукумати мамлакатнинг собиқ президенти Пак Кин Хени афв этишга қарор қилди. Бу ҳақда Yonhap агентлигига таяниб, «РБК» хабар берди.
Собиқ президент яқинлашиб келаётган Янги йил муносабати билан афв этиладиганлар рўйхатига киритилган. Бу каби қарор 69 ёшли Пак Кин Хенинг саломатлиги ёмонлашгани сабаб қабул қилинган. 2021 йилда у уч марта елкаси ва белидаги оғриқ сабаб шифохонага ётқизилган ҳамда операция қилинган.
2018 йилда Пак Кин Хе давлат сирини ошкор этиш, тамагирлик, ваколатини суиистеъмол қилиш ва пора олишда айбланиб, 24 йил муддатда озодликдан маҳрум этилган ва унга нисбатан 18 миллиард вон (ўша вақтдаги курс бўйича 17,5 миллион доллар) жарима белгиланган. Шундан сўнг ҳукм қайта кўриб чиқилган ва 2021 йилнинг январида мамлакат Олий суди собиқ давлат раҳбарига нисбатан чиқарилган 20 йиллик қамоқ жазосини ўз кучида қолдирганди.
Пак Кин Хе 2017 йилда коррупция можаросига алоқадорлиги сабабли ҳокимиятдан четлаштирилган. У дўсти Чхве Сун Сил билан тил бириктириб, Samsung ва Lotte каби йирик компанияларни Сун Сил назорат қилган иккита жамғармага 77,4 миллиард вон ажратишга мажбур қилганликда, шунингдек, 2018 йили Миллий разведка хизматидан 2,5 миллиард вонни ноқонуний олганликда айбланган.
Эслатиб ўтамиз, Жанубий Кореянинг коррупцияда айбланган яна бир собиқ президенти Ли Мён Бак 17 йилга қамалган эди.
Изоҳ (0)