2021 йил ноябрь ойида Ўзбекистонда кўчмас мулк олди-сотдиси бўйича 22,5 мингта шартнома тузилди. Бу ҳақда кўчмас мулк бозоридаги талаб ўзгаришларни доимий равишда таҳлил қилиб келаётган Иқтисодий тадқиқотлар ва ислоҳотлар маркази маълумотларида келтирилган. Таъкидланишича, тузилган шартномалар сони сентябрь ойига нисбатан 4 фоизга (21,6 минг) кўп демак.
Қайд этилишича, мазкур кўрсаткичнинг 2020 йил (14,4 фоиз) ва 2019 йил (40,6 фоиз) ноябрь ойларига нисбатан кескин ўсиши уй-жой бозорида талабнинг ҳали ҳам жуда баландлигидан далолат беради. Энг юқори ўсиш суръатлари Сурхондарё (22,9 фоиз), Наманган (17,3 фоиз), Хоразм (14,3 фоиз) вилоятларида кузатилган бўлса; Андижон (14,1 фоиз), Самарқанд (6,6 фоиз) ва Тошкент (3,7 фоиз) вилоятларида камайиш кузатилган.
Ноябрь ойида октябрь ойига нисбатан иккиламчи бозорда ўртача уй-жой нархлари 1,2 фоизга ўсган. Нархларда энг катта ўсиш Тошкент (3,2 фоиз), Самарқанд (3,1 фоиз) ва Хоразм (3 фоиз) вилоятларида кузатилган бўлса, Навоий (-1,4 фоиз) вилоятида уй-жой нархлари пасайган.
Шаҳарлар кесимида уй-жой нархларининг энг баланд қиймати Тошкент (1 квадрат метр учун 753 доллар), Самарқанд (553 доллар) ва Навоий (418 доллар) шаҳарларида, нисбатан пастроқ нархлар эса Нукус (277 доллар), Қарши (289 доллар) ва Гулистон (289 доллар) шаҳарларида қайд этилган.
Шунингдек, Тошкент шаҳри ва вилоятлар марказлари кесимидаги ўртача уй-жой нархлари асосида иккиламчи бозорда уй-жой харид қилиш учун ипотека кредити олишга (субсидиясиз) лаёқатли аҳоли улуши ҳисоблаб чиқилган. Уй-жой харид қилишда ипотека кредити олишга лаёқатли аҳоли улушини ҳисоблашда 62 квадрат метр майдонли уйни харид қилишда оила даромадининг ипотека кредитига йўналтирадиган қисми 50 фоизгача, кредит муддати 20 йил ва бошланғич тўлов бадали 30 фоиз деб ҳисобланган.
Самарқандда (13 фоиз), Наманган (19 фоиз) вилоятлари ва Тошкент (15 фоиз) шаҳрида уй-жой нархларининг баландлиги туфайли ипотека асосида уй-жой сотиб олишга имконияти бор хонадонлар улуши паст. Жорий нархларни ҳисобга олганда Фарғона (35 фоиз), Қорақалпоғистон (33 фоиз) ва Навоийда (32,9 фоиз) ипотека шартлари асосида уй-жой харид қилиш имконияти бошқа ҳудудларга нисбатан юқори.
Ҳисоб-китобларга кўра, республика бўйича ипотека кредити асосида уй-жой харид қилишга лаёқатли аҳоли улуши 26 фоизни ташкил этмоқда.
Умуман олганда, 2021 йил январь—ноябрь ойларида жисмоний шахсларга ажратилган ипотека кредитлари ҳажми 8 триллион сўмни ташкил этган. Бунда, янги тартиб асосида ипотека кредитлари орқали аҳолини уй-жой билан таъминлашга Молия вазирлиги томонидан ажратилган ресурслар ҳажми 3 баробарга ошиб, 3,9 триллион сўмга етган (2020 йилда 1,3 триллион сўм эди).
Аввалроқ Ўзбекистонда 2021 йилнинг учинчи чорагида иккиламчи кўчмас мулк бозоридаги нархлар ўтган чоракка нисбатан 2,3 фоизга ошгани ҳақида хабар берилган эди.
Изоҳ (0)