Кремль: Рамзан Қодиров Дудаев боғи юзасидан Туркия президентига мурожаат қилиб ҳиссиётга берилган

Чеченистон раҳбари Рамзан Қодиров Туркияда Жохар Дудаев номидаги боғнинг очилиши юзасидан билдирган муносабатида ҳиссиётга эрк берган, аммо уни тушуниш керак, дея ўз фикрини айтиб ўтган Россия президенти матбуот котиби Дмитрий Песков.

«Россиянинг ушбу ҳудуди(Чеченистон)ни ўз назоратига олишга уринган террорчилар томонидан бошланган бир неча урушларда омон қолган ҳудуд раҳбарининг ушбу муносабати жуда-жуда ҳиссий, аммо тушунарли», — деди Песков.

10 декабрь куни Туркия шимоли-ғарбидаги Кёрфез шаҳрида чечен айирмачилари етакчиси Жохар Дудаев шарафига боғ очилганди. 1991 йилда Дудаев Чеченистон Ичкерия Республикасини эълон қилган («Ичкерия ва Доғистон халқлари конгресси» Россия қонунчилигига мувофиқ террорчи деб тан олинган ташкилотларнинг ягона федерал рўйхатига киритилган). 1996 йилда Россия махсус хизматлари Дудаевни йўқ қилган.

Туркиядаги боғнинг очилиш маросимида маҳаллий ҳокимлик Дудаевни «озодлик учун кураш» рамзи деб атаган. Қодиров Туркия террорчиларни бекитаётганини айтди ва мамлакат президенти Ражаб Тоййиб Эрдўғонни «бир қарорга келишга» чақирди: «Ёки террорчиларни омма олдида қўллаб-қувватлайдиган давлат мақомини олинг ёки Россия Федерациясининг орқа томонида ўз эътиқодларингизни ўзгартиравермасдан, у билан шаффоф ва ҳалол муносабатлар тарафдори бўлинг», — деб ёзган у Telegram каналида.

Қодиров Туркиянинг ҳаракатларини Россия—Туркия муносабатларига таҳдид деб атади. Унинг сўзларига кўра, «қидирувдаги бандитлар ва безорилар» Туркияда бошпана топиб, боғлар номини террорчилар номига ўзгартириш бўйича намойишкорона йиғилишлар ва тадбирларни ташкил этар экан, Чеченистон жавоб чораларини кўриш ҳуқуқини ўзида сақлаб қолади.

Қодировнинг айтишича, Туркияда террорчи ташкилот деб ҳисобланган «Курдистон ишчилар партияси» асосчиси Абдулла Ўжаланнинг номини Грознийда абадийлаштириш Анқаранинг ҳаракатларига жавоб бўлиши мумкин.

Аввалроқ Россия Ташқи ишлар вазирлигининг расмий вакили Мария Захарова Туркияда Жоҳар Дудаев номидаги боғнинг очилишини қоралаганди. Унинг сўзларига кўра, Россия «экстремистлар, террорчилар, жангарилар ва коллаборационистларга ҳар қандай ёдгорлик ўрнатиш бўйича принципиал позицияга» амал қилади.