Россия президенти Владимир Путин полиция ходимларининг ваколатларини кенгайтирувчи қонунни имзолади. Ҳужжат ҳуқуқий ахборот порталида эълон қилинди, деб ёзади «РБК».
Асосий янгиликлардан бири — полиция ходимларига транспорт воситасини очиш ва унга кириш ҳуқуқи берилди. Эндиликда полиция тартибсизликлар ва фавқулодда вазиятларда фуқароларнинг ҳаётини сақлаб қолиш ёки уларнинг хавфсизлигини таъминлаш; жиноятни бостириш ёки террорчилик ҳаракати хавфи ҳақидаги хабарни текшириш; бахтсиз ҳодисанинг ҳолатларини аниқлаш учун автомашиналарни очиши мумкин.
Бундан ташқари, ички ишлар ходимларига жиноят содир этишда гумон қилинувчи ёки айбланувчиларни, воқеа жойида ушланганларни, шунингдек, жабрланувчилар ёки гувоҳлар томонидан жиноят содир этгани айтилган шахсларни ушлаб туриш учун автомашиналарни очишга рухсат берилади. Яна бир ҳолатда — агар автомашинада маъмурий ҳуқуқбузарлик содир этган маст киши борлигини «тасдиқловчи асослар мавжуд бўлса», машинани тинтиш мумкин.
Қонунга кўра, автомобилни очишдан олдин полиция ходими ўзини таништиради, ҳужжатларини тақдим этади, ўз ҳаракатларининг сабаби ва асосларини, шунингдек, фуқароларнинг ҳуқуқ ва мажбуриятларини тушунтиради («вақт ўтказиш ҳаёт ва соғлиқ учун хавф туғдирадиган» ҳоллар бундан мустасно). Агар ўша пайтда машина эгаси унинг ёнида бўлмаса, полиция уни воқеа ҳақида 24 соат ичида хабардор қилиши керак.
Шунингдек, қонун ички ишлар ходимларининг турар жой ва бошқа биноларга, ер ва ҳудудларга ҳибсга олиш учун киришдаги ваколатларини кенгайтиради. Ҳужжатнинг аввалги таҳририда полиция жиноятда гумонланувчиларни қўлга олиш учун уйларга кириши мумкин эди. Янги таҳрирда эса полиция жиноятда гумон қилинганларни фақат жабрланувчилар ва гувоҳларнинг сўзлари билан ҳам ҳибсга олиши мумкинлиги айтилган.
Россия ҳукумати полиция ваколатларини кенгайтириш тўғрисидаги қонун лойиҳасини 2020 йил май ойида Давлат Думасига тақдим этганди, шу йилнинг 8 декабрида қуйи палата уни учинчи — якуний ўқишда қабул қилди.
Бундан ташқари, Путин Россия субъектларида давлат ҳокимиятини ташкил этиш тўғрисидаги қонунни ҳам тасдиқлади, деб ёзади «РБК». Янги қонунга кўра, Россия таркибига кирувчи ҳудудлар раҳбарлар энди президент деб аталмайди.
«Россия Федерацияси субъектининг энг юқори мансабдор шахси лавозими Россия Федерацияси субъектининг номини кўрсатган ҳолда «раҳбари» деб аталади. Бундай номда давлат раҳбари — Россия Федерацияси президенти лавозимининг номини ташкил этувчи сўзлар ва иборалар ишлатилиши мумкин эмас», — дейилади янги қонуннинг 20-моддаси 4- ва 6-бандларида.
Ҳужжат ҳали кўриб чиқилаётган пайтда Татаристонда норозиликка сабаб бўлганди, чунки минтақа раҳбари лавозими «Татаристон Республикаси президенти» деб аталади. Татаристон парламенти қонун лойиҳасига қарши чиққан, улар ҳужжат қоидаларини Россия конституциявий тузумининг асосларига зид деб атаганди.
Татаристон Россия таркибидаги унинг раҳбари президент деб аталувчи ягона ҳудуд бўлиб қолмоқда.
«Давлат ҳокимиятини ташкил этиш тўғрисида»ги қонунда, шунингдек, ҳудуд раҳбарларига кетма-кет икки мартадан ортиқ сайланиш ҳуқуқи берилган, президентнинг ҳудуд раҳбарларини ишончни йўқотган тақдирда лавозимидан четлаштириш ҳуқуқи эса мустаҳкамланган.
Қонун ҳудудларга субъект раҳбари сайланиши мумкин бўлган муддатларнинг максимал сонини мустақил равишда белгилаш ҳуқуқини беради. Аввал ваколат муддати бир хил — беш йил этиб белгиланганди. Шу билан бирга, қонунда 30 ёшдан ошган, яшаш учун рухсатномаси ёки бошқа давлат фуқаролигига эга бўлмаган шахс ҳудуд раҳбари бўлиши мумкинлиги белгилаб қўйилган.
Ҳудуд раҳбари бир вақтнинг ўзида бошқа ҳақ тўланадиган ишда ишлай олмайди. Унга хорижий нотижорат ташкилотлари раҳбариятида ишлашга рухсат берилмайди.
Ҳудуд раҳбари ҳар қандай асослар бўйича ишончни йўқотгани муносабати билан ёки ҳудуднинг қонун чиқарувчи кенгаши томонидан ишончсизлик билдирилганидан кейин президент томонидан лавозимидан четлатилиши мумкин. Илгари президент коррупция ёки манфаатлар тўқнашуви фактлари туфайли ишонч йўқолган ҳудуд раҳбарларини лавозимидан четлаштириши мумкин эди.
Изоҳ (0)