Францияда сўнгги 24 соат ичида яна 73 мингдан ортиқ кишида COVID-19 инфекцияси қайд этилди. Бу пандемия бошидан бери янги антирекорд, дейилади BFMTV хабарида.
«Рождество ва Янги йил оралиғидаги даврда Франция бўйлаб коронавируснинг ‘омикрон» штамми устунлик қилади», — деди мамлакатнинг Соғлиқни сақлаш вазирлиги раҳбари Оливе Веран.
Унинг қўшимча қилишича, ҳукумат касалланишнинг бундан-да кўпроқ ҳолатларини прогноз қилмоқда. «Ой охиригача кунлик юқтиришлар сони 100 мингдан ошиб кетади», — деди вазир.
Вераннинг сўзларига кўра, «омикрон» тез тарқалмоқда — ҳозирда касалланиш бўйича янги ҳолатларнинг, тахминан, 20 фоизини; Париж ва унинг атрофида эса тахминан 35 фоизини мазкур штамм ташкил қилмоқда.
Бунгача Францияда бир суткада рекорд даражада кўп одамда вирус аниқланган ҳолат декабрь ойининг бошида кузатилганди — 59 019 киши.
Жонс Ҳопкинс университети маълумотларига кўра, Францияда коронавирусга чалинганларнинг умумий сони 8,8 миллион кишига етган, қарийб 113 минг киши инфекция қурбони бўлган, шунингдек, мамлакатда 118 725 069 дозада коронавирусга қарши вакцина ишлатилган.
Изоҳ (0)