Илон Маск Tesla компаниясидаги улушининг 10 фоизини сотиш ҳақидаги ваъдасини бажариш учун етарлича акцияларни сотди. Бу ҳақда миллиардер The Babylon Bee сатирик нашрига берган интервьюсида маълум қилди.
«10 фоиз атрофидаги мўлжалга етиш учун етарли миқдорда акцияларни сотдим ва бунда имкон қадар аниқликка ҳаракат қилдим», — деди Tesla раҳбари.
MarketWatch’нинг АҚШ Қимматли қоғозлар ва биржалар комиссияси ҳужжатларига таяниб маълум қилишича, 21 декабрь куни Маск икки миллионта акцияни сотиб олиш опционларини реализация қилган ва Tesla’нинг 584 мингга яқин қимматли қоғозларини сотган.
Натижада тадбиркор томонидан сотилган акцияларнинг умумий сони 13,5 миллион донага етди. Reuters ҳисоб-китобларига кўра, бу Маск сотмоқчи бўлган миқдорнинг 80 фоизини ташкил қилади. Ноябрь ойи бошида, Маск Twitter’даги обуначилари орасида сўровнома ўтказган пайтда, унга тегишли улушнинг 10 фоизи тахминан 17 миллионта акцияга тўғри келарди.
Шу билан бирга, Маск ҳар бири учун 6,24 доллардан 16,4 миллион дона акцияни сотиб олиш опционларини реализация қилди, бу эса аслида унинг компаниядаги улушини оширди, деб ёзади MarketWatch.
8 ноябрь куни Маск Twitter’даги обуначилари орасида сўровнома ўтказган. Унда бизнесмен обуначилардан Tesla акцияларининг 10 фоизини сотиш керакми ёки йўқлигини сўраган ва ҳар қандай ҳолатда овоз бериш натижаларига риоя қилишга ваъда берган. Унинг айтишича, акцияларни сотиш солиқ тўлашнинг ягона йўли, чунки у иш ҳақи ёки бонуслар олмайди. Респондентларнинг деярли 58 фоизи акцияларни сотиш учун овоз берган, унда 3,5 миллиондан ортиқ киши иштирок этган.
Reuters маълумотларига кўра, сўровдан олдин Маск Tesla’нинг умумий қиймати 200 миллиард доллардан ортиқ бўлган 170,5 миллионга яқин акциясига эгалик қилган, 10 фоиз улуши эса 21 миллиард долларга баҳоланган.
Умуман олганда, сўровномадан сўнг тадбиркор Tesla акцияларини сотишдан 14 миллиард доллардан кўпроқ даромад олди. Шу билан бирга у ушбу пулларнинг катта қисмини — 11 миллиард доллардан кўпроғини 2021 йилги солиқларни тўлашга сарфламоқчи.
Изоҳ (0)