Андижонда 250 млрд сўмга 700 метр узунликдаги кўприк қурилади

Андижонда Марказий темир йўл вокзали устидан ўтувчи ва шаҳарнинг икки қисмини боғловчи 700 метр узунликдаги кўприк қурилади. Бу ҳақда вилоят ҳокими Шуҳрат Абдураҳмонов андижонликларга қилган мурожаатида маълум қилди, дея хабар берди «Дарё» мухбири.

Келгуси йилда яна бир йирик лойиҳа — Бобур шоҳкўчасининг икки қисмини боғлайдиган ва Марказий темир йўл вокзали устидан ўтадиган узунлиги 700 метрни ташкил этувчи лойиҳа қиймати 250 миллиард сўмлик кўприк қурилиши амалга оширилади. Кўприк фойдаланишга топширилса, Амир Темур шоҳкўчаси, Пахтакор ва Фитрат кўчаларидаги тирбандликларнинг олди олинади. Масофа 5 километрга, вақт сарфи эса 25 фоизга қисқаради.

Шуҳрат Абдураҳмонов, Андижон вилоят ҳокими

Қайд этилишича, 2021 йилда 9,5 километр автомобиль йўлларида жами 132 миллиард сўмлик реконструкция қилинган ҳамда капитал таъмирдан чиқарилган. 440 та маҳалла ва қишлоқлардаги 1471 километрлик ички йўлларда эса жами 201 миллиард сўмлик асфальтлаштириш ва шағаллаштириш ишлари олиб борилган. 9 та кўприк таъмирдан чиқарилган.

2022 йилда умумий фойдаланувдаги автомобиль йўлларида 70 миллиард сўмлик реконструкция, 53 миллиард сўмлик капитал таъмирлаш, 412 миллиард сўмлик 1500 километр узунликдаги ички йўлларни таъмирлаш режалаштирилган.

Эслатиб ўтамиз, Самарқанд вилоятида инфратузилмани яхшилашга 2022 йилда 274,4 миллиард сўм ажратилиши хабар қилинганди. Маблағ ҳисобидан иккита туннел ва иккита йўл ўтказгич кўприк қурилади.