Чилонзордаги «Шовотландия» кафесини ёқиб юборган икки шахс умрбод озодликдан маҳрум этилди

Тошкент шаҳри Чилонзор туманидаги «Шовотландия» кафесида 27 февраль ўт қўйилган, бунинг оқибатида 5 киши ҳалок бўлганди. Тезкор қидирув тадбирлари натижасида жиноятни содир этган шахс шу куннинг ўзидаёқ ушланган. «Gazeta.uz» манбасининг маълум қилишича, 21 декабрь куни мазкур жиноят юзасидан суд ҳукми ўқилган.

Воқеа қандай содир бўлганди?

26 ёшли судланувчи қамоқдан чиққач, 36 ёшли судланувчи уни ўзи ишлаб келаётган Зангиота тумани «Эшонгузар» қўрғонидаги чойхонага ишга олган ва уни ўзига молиявий жиҳатдан тобе қилиб қўйган. Оқибатда эса ҳар қандай, хусусан, жиноий топшириқларни бажартириб келган.

Қайд этилишича, кафенинг эгаси телефон орқали 36 ёшли судланувчидан ёрдам сўраб, «Эдди» лақабли шахс унинг қариндошидан пулини бўлиб-бўлиб бериш шарти билан 5 дона iPhone 11 Pro телефонини олиб, муайян миқдордаги пулларни тўлагани ва қолган 4000 долларни бермай юрганини айтган. У эса «Эдди» билан боғланиб, унга пулларни беришини тайинлаган ҳамда ёрдам сўраган шахсдан бунинг эвазига 1500 долларлик iPhone олиб беришини айтган.

Кафе эгаси рад этгач, судланувчи уни ўзининг чойхонасига чақириб, ҳақоратлайди. Бунга жавобан ўзини хўрланган деб ҳисоблаган шахс «Шовотландия» кафесидаги ўзининг офисига судланувчини чақиради. Икки ўртада ўзаро можаро юзага келади ва кафе эгаси хонадан чиқиб кетади. Ташқарида уни кутиб турган танишлари эса судланувчи ва унинг 2 нафар шериги хонадалигини билиб туриб, эшик ва ойналарга тош отади.

36 ёшли судланувчи ва унинг шериклари воқеа жойидан қочишга эришиб, ўзининг чойхонасига боради ва 26 ёшли судланувчига бўлган воқеаларни айтиб, қасд олиш режасини тузади. Унга кўра, «Шовотландия» эгаси офисда тунаб қолган вақтда кафега ўт қўйишга келишиб олишади.

Суд ҳужжатларига мувофиқ, 36 ёшли судланувчи ўзига «ишончли алиби» шакллантириш учун ўзи доимий яшаган хонадонда қолади. 26 ёшли судланувчи эса ярим тунда таксида кафега боради ва «Молотов коктейли»ни тайёрлаб, уларни кафенинг тез ёнувчи қисмларига улоқтиради. Шундан сўнг воқеа жойидан яширинади.

Суд маълумотларига кўра, ёнғин оқибатида «Шовотландия» кафесининг 644 миллион 799 минг 538 сўмлик биноси ҳамда ундаги 420,4 миллион сўмлик ошхона жиҳозлари тўлиқ ёнган. Суд-тиббий экспертизасининг хулосаларига кўра, бино ичида ухлаб ётган икки нафар аёл (1960 йилда туғилган), икки нафар йигит (1998 йилда туғилган) ва бир нафар қиз (1999 йилда туғилган) ис газидан заҳарланиш фонида тананинг 100 фоиз 3—4-даражали термик куйиши оқибатида вафот этган.

Ёнғинга сабабчи сифатида гумон қилинган фуқаро (1985 йилда туғилган) Жиноят кодекси 97-моддаси 2-қисмининг а, в, д, ж, п бандлари (қасддан одам ўлдириш), 165-моддасининг 1-қисми (товламачилик), 173-моддаси 2-қисмининг б, в бандларида (мулкни қасддан нобуд қилиш ёки унга зарар етказиш) назарда тутилган жиноятларни содир қилганликда айбли деб топилган.

Унга Жиноят кодексининг 59-моддаси 4-қисми тартибида тайинланган енгилроқ жазоларни умрбод озодликдан маҳрум қилиш жазоси билан қоплаш орқали узил-кесил умрбод озодликдан маҳрум қилиш жазоси тайинланган.

Шунингдек, яна бир судланувчи (1995 йилда туғилган) Жиноят кодекси 97-моддаси 2-қисмининг а, в, д, ж, п бандлари (қасддан одам ўлдириш), 173-моддаси 2-қисмининг б, в бандларида (мулкни қасддан нобуд қилиш ёки унга зарар етказиш) назарда тутилган жиноятларни содир қилганликда айбли деб топилган. Жиноят кодекси 59-моддасининг 4-қисми тартибида тайинланган енгилроқ жазоларни умрбод озодликдан маҳрум қилиш жазоси билан қоплаш орқали узил-кесил умрбод озодликдан маҳрум қилиш жазоси тайинланган.

Шунингдек, унга (1985 йилда туғилган фуқарога — таҳ.) ЖИБ Яккасарой туман судининг 2014 йил 11 июлдаги ҳукми билан тайинланган жазонинг ўталмаган муддати қўшилиб, енгилроқ жазони умрбод озодликдан маҳрум қилиш жазоси билан қоплаш орқали узил-кесил умрбод озодликдан маҳрум қилиш жазоси тайинланган.

Суд ҳукми эълон қилинган кундан 20 кун ўтиб кучга киради.