Наманганда поезд пиёдани уриб кетди, қизил чироқда ўтган Lada бир кишининг умрига зомин бўлди. ЙТҲлар тафсилоти

Ўзбекистон йўлларида содир бўлган ҳодисалар тафсилотини тақдим этамиз.

Қаршида Lada Vesta пиёдаларни уриб кетиб, воқеа жойидан яширинди.

2021 йил 17 декабрь куни 07:20 ларда Қарши–Бешкент йўлининг 4-километрида жойлашган чорраҳада Lada Vesta автомобили светофорнинг қизил чироғидан ўтиб кетиб икки пиёдани уриб юборган. Шундан сўнг ҳайдовчи воқеа жойидан яширинган.

Оқибатда бир пиёда вафот этган иккинчиси шифохонага ётқизилган.

Тезкор-суриштирув натижасида ҳайдовчи топилиб, унга нисбатан Жиноят кодексининг 266-моддаси 2-қисми (одам ўлимига сабаб бўлган транспорт бошқариш қоидаларини бузиш) ва 117-модда 2-қисми (хавф остида қолдириш) билан жиноий иш қўзғатилган.

Наманганда поезд пиёдани уриб юборди.

Наманган вилояти Поп туманида 45 та вагони бўлган юк поезди машинисти Қўшминор–Поп темир йўл бекатлари орасида темир йўл изи яқинида ҳаракатланиб кетаётган бир нафар фуқарони кўриб қолган. Машинист бир неча бор огоҳлантиришига қарамай фуқаро поезд изидан узоқлашмаган.

Оқибатда поезд фуқарони уриб юборган. Жабрланувчи шифохонага олиб кетилаётганда вафот этган.

Сергелида юк машинаси Lacetti билан тўқнашди.

22 декабрь куни тахминан соат 12:00 да Сергели тумани Тошкент ҳалқа автомобиль йўлида «КамАЗ» юк автомобилини тегишли ҳужжатсиз (прицепли транспорт воситасини бошқаришга рухсат берувчи) ҳайдаган А.А. (2000 йилда туғилган) бошқарувни йўқотган.

Оқибатида юк машинаси қарама-қарши ҳаракат йўналишига чиқиб кетган ва 41 ёшли Ф.М. бошқарувидаги Lacetti автомобилига тўқнашган. Тўқнашувдан сўнг А.А. ўз ҳаракат йўлагига қайтган ва ариқдан ўтиб йўл четида тўхтаган.

ЙТҲ оқибатида ҳеч ким тиббий ёрдам учун мурожаат қилмаган.

Мазкур факт бўйича текширув олиб борилмоқда.