Namanganda poyezd piyodani urib ketdi, qizil chiroqda o‘tgan Lada bir kishining umriga zomin bo‘ldi. YTHlar tafsiloti

O‘zbekiston yo‘llarida sodir bo‘lgan hodisalar tafsilotini taqdim etamiz.

Qarshida Lada Vesta piyodalarni urib ketib, voqea joyidan yashirindi.

2021-yil 17-dekabr kuni 07:20 larda Qarshi–Beshkent yo‘lining 4-kilometrida joylashgan chorrahada Lada Vesta avtomobili svetoforning qizil chirog‘idan o‘tib ketib ikki piyodani urib yuborgan. Shundan so‘ng haydovchi voqea joyidan yashiringan.

Oqibatda bir piyoda vafot etgan ikkinchisi shifoxonaga yotqizilgan.

Tezkor-surishtiruv natijasida haydovchi topilib, unga nisbatan Jinoyat kodeksining 266-moddasi 2-qismi (odam o‘limiga sabab bo‘lgan transport boshqarish qoidalarini buzish) va 117-modda 2-qismi (xavf ostida qoldirish) bilan jinoiy ish qo‘zg‘atilgan.

Namanganda poyezd piyodani urib yubordi.

Namangan viloyati Pop tumanida 45 ta vagoni bo‘lgan yuk poyezdi mashinisti Qo‘shminor–Pop temiryo‘l bekatlari orasida temiryo‘l izi yaqinida harakatlanib ketayotgan bir nafar fuqaroni ko‘rib qolgan. Mashinist bir necha bor ogohlantirishiga qaramay fuqaro poyezd izidan uzoqlashmagan.

Oqibatda poyezd fuqaroni urib yuborgan. Jabrlanuvchi shifoxonaga olib ketilayotganda vafot etgan.

Sergelida yuk mashinasi Lacetti bilan to‘qnashdi.

22-dekabr kuni taxminan soat 12:00 da Sergeli tumani Toshkent halqa avtomobil yo‘lida “KamAZ” yuk avtomobilini tegishli hujjatsiz (pritsepli transport vositasini boshqarishga ruxsat beruvchi) haydagan A.A. (2000-yilda tug‘ilgan) boshqaruvni yo‘qotgan.

Oqibatida yuk mashinasi qarama-qarshi harakat yo‘nalishiga chiqib ketgan va 41 yoshli F.M. boshqaruvidagi Lacetti avtomobiliga to‘qnashgan. To‘qnashuvdan so‘ng A.A. o‘z harakat yo‘lagiga qaytgan va ariqdan o‘tib yo‘l chetida to‘xtagan.

YTH oqibatida hech kim tibbiy yordam uchun murojaat qilmagan.

Mazkur fakt bo‘yicha tekshiruv olib borilmoqda.