Қариндошлар ўртасида никоҳ аксарият ҳолларда бобо-буви ёки ота-оналарнинг ташаббуси билан бўлади. Бу ҳақда АОКАда бўлиб ўтган брифингда Маҳалла ва оилани қўллаб-қувватлаш вазирлиги бошқарма бошлиғи Мукаррам Нурматова маълум қилди.
Унинг сўзларига кўра, «Маҳалла ва оила» илмий-тадқиқот институти билан биргаликда 2021 йил май—июнь ойларида қариндошлар ўртасида никоҳ тузиш ҳолатлари ва унинг сабабларини ўрганиш мақсадида республиканинг 200 та туманида 6 974 та фуқаролар йиғини раислари ўртасида социологик сўров ўтказилган.
Социологик сўровномада қариндошлар ўртасида тузилган никоҳлардаги оилаларнинг ҳаёти қандай кечаётганини аниқлашга қаратилган саволларга респондентларнинг
- 25,2 фоизида зиддият ва низолар учраб турганини,
- 24,9 фоиз оилаларда ногирон фарзандлар борлиги,
- 8,9 фоиз қариндошлик асосида қурилган оилаларда муаммолар мавжудлиги (доимий қуда-андачиликдаги келишмовчиликлар бўлаётгани) билдирилган.
- 58,1 фоиз бобо-бувилар,
- 56,4 фоизи ота-оналар,
- 14,3 фоизи тоға-хола ва амаки-аммалар,
- 13,2 фоизи опа-сингиллар,
- 1,2 фоизи ака-укалар,
- 8,3 фоизи бошқа шахслар
Таъкидланишича, яқин қариндошлар ўртасидаги никоҳлар ҳанузгача ошкора ёки яширин ҳолда ноқонуний қайд этилиши ҳолатлари учрамоқда. «Мамлакатимиздаги барча олий ўқув юртларида ва тиббий маслаҳатхоналарда, маҳаллаларда бу борада олиб борилаётган тушунтириш ишлари йўлга қўйилганлигига қарамай, салбий ҳолатлар ҳамон тез-тез учраб турибди», — дейди Нурматова.
Аввалроқ Ўзбекистоннинг қайси вилоятида қариндошлар ўртасида никоҳ тузиш ҳолатлари кўпроқ экани тўғрисида хабар берилганди. Маълумотларга кўра, мамлакатда 2021 йилнинг июль—сентябрь ойларида ФҲДЁ органлари томонидан қариндош бўлган 675 нафар келин-куёвнинг никоҳлари қайд қилинган.
Изоҳ (0)