Наманганда экспорт имкониятларини кенгайтириш, маҳаллий маҳсулотларни тарғиб қилиш ва доимий тақдимотини ташкил этиш учун «Наманган Экспомарказ» ташкил этилади. Бу ҳақда вилоят ҳокими Шавкат Абдураззақов халқ депутатлари вилоят кенгаши сессиясидаги мурожаатида маълум қилди, дея хабар беради «Дарё» мухбири Азизбек Абдувалиев.
Абдураззақовга кўра, 2021 йили вилоятда ташқи иқтисодий фаолият ва инвестицияларни ўзлаштириш юқори суръатларда амалга оширилган. Хитой, Туркия, Нидерландия, Ҳиндистон, Бельгия, Германия ва Россия каби ўнлаб давлатлардан жами 303,6 миллион доллар тўғридан-тўғри хорижий инвестиция ва кредит маблағлари жалб этилди.
Жумладан, Чуст туманидаги «Наманган цемент» корхонаси томонидан 16 миллион доллар, Наманган шаҳридаги Namangan Qianxing Investment МЧЖ томонидан 12,8 миллион доллар ўзлаштирилган.
Вилоятда яна бир муҳим йўналиш — экспорт ҳам эътибордан четда қолгани йўқ. Жорий йил давомида 464 миллион доллар қийматига тенг маҳаллий маҳсулотлар экспорт қилинди. Хусусан, 293 миллион долларлик саноат ва 71 миллион долларлик мева-сабзавот маҳсулотлари ташқи бозорга чиқарилди.
«Намангандаги 465 та экспортёр корхона томонидан 52 та давлатга 67 турдаги саноат ва мева-сабзавот маҳсулотлари экспорт қилинди. 5 та биз учун янги — Перу, Венесуэла, Тунис, Босния ва Герцеговина ҳамда Жанубий Африка давлатлари бозорларига кириб борилди. Керамик кафел плита, сунъий тола, арматура, қурилиш қопламалари ва бўёқлари каби 11 та янги турдаги маҳсулотлар экспорти амалга оширилди», — дея қайд этиб ўтди вилоят ҳокими.
Вилоят ҳокимининг таъкидлашича, Наманганда 2022 йили жами 350 миллион доллар миқдоридаги хорижий инвестиция ва кредит маблағларини жалб этиш режалаштирилмоқда.
Изоҳ (0)