Шавкат Мирзиёев Олмалиқдаги ихтисослаштирилган мактаб ва оилавий поликлиникани бориб кўрди

Шавкат Мирзиёев Олмалиқ шаҳридаги 20-ихтисослаштирилган умумтаълим мактабига борди. Бу ерда математика, она тили, инглиз тили чуқурлаштириб ўқитилади.

Муассаса уч қаватли бўлиб, 1 минг 500 нафардан зиёд ўқувчига мўлжалланган. Жорий йилда мактаб биноси мукаммал таъмирланган. 46 та синфхона, 3 та лаборатория ва фан хоналари замонавий жиҳозланган.

Давлат раҳбари бу ердаги шароитларни кўздан кечирди, мактаб ўқувчилари билан суҳбатлашди.

«Ҳар дақиқа — бойлик. Бу бойликдан фойдаланиб, чуқур билим олишингиз керак. Мана, Олмалиқ комбинатининг қувватини оширяпмиз, янги фабрикалар қуряпмиз. Уларда ким ишлайди? Сизлар! Ҳамма ислоҳотларимизнинг асоси, ишончи — билимли ёшлар», — деди Шавкат Мирзиёев.

Мазкур поликлиника 1989 йилда қурилган бўлиб, 2017 йилда капитал таъмирланган. Бу ерда Олмалиқ шаҳар тез тиббий ёрдам бўлими, марказий шифохона, болалар шифохонаси, кўп тармоқли марказий поликлиника ҳам жойлашган. Бу тиббий хизматларни сифатли ва самарали кўрсатишда муҳим омил бўлмоқда.

Президент талаб кўп бўлаётган йўналишларни туманлараро даражага тушириб, хизматларни аҳолига яқинлаштириш, эҳтиёжманд фуқаролар соғлиғини доимий назоратга олиб, инсон қадрини амалда намоён қилиш зарурлигини таъкидлади. Шу мақсадда Тошкент вилоятида тиббиёт бўйича уч йиллик дастур ишлаб чиқиш вазифаси қўйилди.

Шу ерда Олмалиқ шаҳрида қуриладиган «Янги Ўзбекистон» мавзеси ҳақида маълумот берилди. Яқин йилларда шаҳар аҳолиси 130 мингдан 200 мингга етиши қайд этилди.

Давлат раҳбари улар учун муносиб шароитлар яратишни ҳозирдан ўйлаш, уй-жой, ижтимоий инфратузилма барпо этиш кераклигини таъкидлаб, мутасаддиларга бу бўйича кўрсатмалар берди.