Ангренда икки юк поезди тўқнашуви оқибатида 20 та вагон ағдарилди (видео)

Ижтимоий тармоқларда Тошкент вилояти Ангрен шаҳри ҳудудида поезд ағдарилиб кетгани акс этган видеолавҳа тарқалди. Фавқулодда вазиятлар вазирлиги ҳолат бўйича маълумот берди.

Маълум қилинишича, ҳолат 19 декабрь куни соат 05:03 да Ангрен шаҳридан 19 километр шарқий йўналишда жойлашган «Ўзбеккўмир» АЖга қарашли «Ангрен кўмир кони» ҳудудида содир бўлган. 010-сонли локомотив состав электровознинг сиқилган ҳавосиз қолиши оқибатида бошқарувсиз ҳаракатланган ва 1-йўлда ҳаракатланиб кетаётган 017-сонли локомотив составига урилган.

Оқибатда жами 33 та юк вагонидан 20 таси (010-сонли поезддан 14 та кўмир ортилган юк вагон ва 017-сонли локоматив составидан 6 та бўш вагон) темир йўл изидан чиқиб, ағдарилган.

Ҳодиса оқибатида 010-сонли поезд машинисти ва унинг ёрдамчиси енгил тан жароҳати олган. Улар «Темир йўл транспорти» филиали ҳудудидаги тиббий ёрдам пунктига олиб борилиб, тиббий ёрдам кўрсатилган ва Ангрен шаҳар шифохонасига юборилган.

Мазкур ҳолат оқибатларини бартараф этиш мақсадида воқеа жойига «Ўзбеккўмир» АЖ тасарруфидаги «Темир йўл транспорт» филиалидан 2 та юк крани, 2 та погрузчик ва 50 нафар ишчи-ходим жалб этилган.

«Бартараф этиш ишлари давом этмоқда. Содир бўлган ҳолат юзасидан дастлабки терговолди суриштирув ишлари олиб борилмоқда», — дейилади хабарда.