Ижтимоий тармоқларда Қамчиқ довонида қуюқ туман тушгани боис автомобиль йўлида кўринувчанлик қисқаргани айтилган видео тарқалмоқда. ИИВ ЙҲХББ мазкур ҳолатни рад этиб, ҳозирда довонда об-ҳаво шароити тасвирланган суратлар билан бўлишди.
Интернетда тарқалган видеода Қамчиқ довонига тушган жуда қуюқ туман сабаб 5-10 метр зўрға кўринаётгани айтилган. Идора матбуот хизмати томонидан эълон қилинган суратлардан кўриш мумкинки, довонда туман йўқ.
«Юқоридаги суратлар айни вақтларда олинган бўлиб, довонда об-ҳаво шароити яхши, туман йўқ, йўллар қуруқ бўлиб, ҳаракат хавфсизлиги ходимлар томонидан таъминланмоқда», — дейилади муносабатда.
Эслатиб ўтамиз, 17 ноябрда ҳам Қамчиқ довонида кучли қор, довон йўлида яхлама ва қор уюмлари юзага келганди. Йўлдаги қорни тозалашга 121 та техника ва 350 га яқин ишчи жалб этилган. Шунингдек, довонда 25 ноябрь куни қор ёға бошлаган ва 26 ноябрь куни йўлларни қордан тозалаш ишлари амалга оширилган эди.
Изоҳ (0)