Шавкат Мирзиёев давлат ташрифи билан Сеулга етиб борди

Ўзбекистон президенти Шавкат Мирзиёев 16 декабрь куни давлат ташрифи билан Жанубий Кореяга келди.

Сеул шаҳридаги аэропортда давлат раҳбарини тантанали кутиб олиш маросими бўлди. Олий мартабали меҳмон шарафига фахрий қоровул саф тортди, артиллериядан тўплар отилди.

Самолёт олдида Ўзбекистон етакчисини Жанубий Корея бош вазири ўринбосари Хонг Нам Ки ва бошқа расмий шахслар кутиб олди.

Саммитнинг асосий тадбирлари – икки томонлама учрашув ва музокаралар 17 декабрь, жума куни бўлиб ўтади.

Маълумот учун, Шавкат Мирзиёев 16–18 декабрь кунлари Жанубий Кореяда давлат ташрифи билан бўлади. Ташриф дастурига мувофиқ, Сеул шаҳрида бўлиб ўтадиган олий даражадаги учрашув ва музокараларда Ўзбекистон–Корея дўстлик ва алоҳида стратегик шериклик муносабатларини янада мустаҳкамлаш, кўп қиррали ҳамкорликни кенгайтириш йўллари кўриб чиқилади.

Энг аввало, «яшил» иқтисодиёт, рақамлаштириш, инновациялар ва юқори технологиялар, таълим, соғлиқни сақлаш ва бошқа устувор йўналишларда амалий ҳамкорлик бўйича дастур ва лойиҳаларни илгари суришга алоҳида эътибор қаратилади.

Шунингдек, Шавкат Мирзиёев Жанубий Корея Миллий ассамблеяси раҳбарияти, ушбу мамлакатнинг энг йирик компания ва банк-молия институтлари вакиллари билан учрашади.

Ташриф якунида салмоқли икки томонлама ҳужжатлар тўплами имзоланиши кўзда тутилган.