Адлия вазири Русланбек Давлетов 16 декабрь куни Ўзбекистон прокуратура органлари ташкил этилганининг 30 йиллигига бағишланган «Ўзбекистон прокуратураси: кеча, бугун ва эртага» мавзусида халқаро илмий-амалий конференциясида иштирок этди. Бу ҳақда вазирлик матбуот хизмати хабар берди.
Ўз нутқида адлия вазири жамиятда қонун устуворлигини таъминлаш, қонунийликни мустаҳкамлаш, фуқароларнинг ҳуқуқ ва эркинликларини ишончли ҳимоя қилишда прокуратура органларининг ролига тўхталиб ўтган.
Таъкидланишича, охирги 3 йилда прокуратура органлари томонидан қонунийликни таъминлаш мақсадида жами 540 мингдан ортиқ прокурор ҳужжатлари қўлланилган. Шунингдек, сўнгги 5 йил давомида Ўзбекистонда коррупцион қилмишни содир этиб, жиноий жавобгарликка тортилган мансабдор шахслар сони 14 мингдан ошган. Шулардан 160 нафардан ортиғи республика миқёсидаги, 1 270 нафардан ортиғи вилоят миқёсидаги ҳамда 13 минг нафардан ортиғи туман миқёсидаги мансабдор шахслар эканлиги прокуратура органларининг коррупцияга тоқатсизлик борасидаги фаолият кўлами қай даражада эканлигини кўрсатади.
Маълум қилинишича, 2021 йилнинг ўтган 6 ойида 140 мингдан ортиқ фуқаронинг мурожаати ҳал этилиб, 23 мингга яқин шахснинг бузилган ҳуқуқлари тикланган.
«Шу билан бирга, тан олиш керак, фақатгина прокуратуранинг бир ўзи қонунийликни тўлиқ таъминлай олмайди. Бу жараёнларда бошқа органлар ҳам, жамоатчилик ҳам фаол иштирок этиши керак. Назорат-текширув соҳаси ҳали ҳамон ислоҳотга муҳтож. Бу ўринда биз бугунги кунда республикадаги турли давлат бошқарув органлари таркибидаги 50 дан ортиқ назорат-текширув идораларини назарда тутяпмиз. Уларнинг 10 дан ортиғи ўзлари текшириши керак бўлган вазирлик ва идораларга бўйсунади. Бир идорада ҳам текширувчи, ҳам текширилувчи бўладиган бўлса, бу ерда манфаатлар тўқнашуви ортидан қандайдир қонун бузилиш ҳолатлари келиб чиқади», — дейди Давлетов.
Шунингдек, у адлия органлари ва прокуратура ўртасидаги ҳамкорлик анча мустаҳкамланганлиги, бугунги кунда Жиноят, Жиноят-процессуал ҳамда Жиноят-ижроия кодекслари устида биргаликда иш олиб борилаётганини ҳам таъкидлаб ўтди.
Аввалроқ Бош прокуратура бошқарма бошлиғининг яна бир ўринбосари пора билан қўлга тушгани, Ўзбекистонда давлат хизматчилари ҳар қандай турдаги мукофот ва совға олиши тақиқланиши кутилаётгани, Ўзбекистонда Коррупцияга қарши курашиш агентлигининг ваколатлари кенгайтирилгани тўғрисида хабар берилганди.
Изоҳ (0)