Олий Мажлис Сенатининг 16 декабрь кунги ялпи мажлисида пойтахт ҳокими Жаҳонгир Ортиқхўжаев Тошкентда дарахтларнинг кесилишига қарши олиб борилаётган ишлар юзасидан маълумот берди.
Таъкидланишича, Тошкент шаҳрида 1,2 миллионга яқин дарахт хатловдан ўтказилган, лекин уларнинг 20 фоизи ҳам Ягона электрон маълумотлар базасига киритилмаган. Мораторийга қарамасдан, дарахтларни кесиш ҳолатлари ҳали ҳам давом этмоқда. 2021 йилнинг январь—ноябрь ойларида 33 639 та дарахтни кесиш учун Экоқўмитага 2479 та ариза келиб тушган. 1483 та аризага рад жавоби берилиб, 22 145 та дарахт сақлаб қолинган.
Сенаторлар Тошкент ҳокимидан экология ёмонлашуви аҳолининг ҳақли эътирозига, ижтимоий тармоқларда кескин муҳокамаларга сабаб бўлаётган масалалар бўйича келгусидаги режалари ва уларни бартараф этиш бўйича олиб борилаётган ишлари тўғрисида маълумот сўраган.
«Аҳамият берсангиз, охирги йилларда умуман дарахтларнинг аниқ эгаси бўлмаган — на Экология қўмитаси, на ҳокимликка қарашли бўлган. Рақамлаштирилмаган, ким қаерга хоҳласа, экиш керак бўлмаган жойларга ҳам дарахт экилган…
Тошкент шаҳар ҳокимлиги қошида Рақамлаштириш маркази ташкил қилинди. Ҳозирда ҳар битта дарахтни ушбу марказда аниқ ҳисобга олиб, бошқарувини йўлга қўйяпмиз. Ҳақиқатан кесилиб кетган жойлар бор. Бизнинг — шаҳар ҳокимлигининг тўғридан-тўғри ёрдам бера олмаган, айбдор бўлган жойлари ҳам бор, мен буни тан оламан. Қурилиш майдонларида кесилиб кетган, нобуд бўлган дарахтлар ҳам борлигини тан оламан. Лекин охирги пайтда сувнинг ер сатҳидан қочиши қурилишларга асло боғлиқ эмас, чунки дунёда экологиянинг ўзгариб бориши фақат Тошкентда эмас, бутун дунёда сувларнинг ер сатҳидан пасайишига олиб келяпти. Ўйлайманки, экологларимиз бунинг устида ҳам ишлашади.
Умуман, бу борада биз 200 вараққа яқин лойиҳа ишлаб чиққанмиз, унда барча қилиниши керак бўлган ишлар ишлаб чиқилган», — дейди пойтахт ҳокими.
Аввалроқ Жаҳонгир Ортиқхўжаев Ғафур Ғулом боғини 49 йилга Сингапур компаниясига ижарага бериш масаласи қайта кўриб чиқилишини айтганди.
Изоҳ (0)