Ўзбекистон йўлларида сўнгги кунларда юз берган ЙТҲ тафсилотларини тақдим этамиз.
Шайхонтоҳурда Nexia-3 икки автомобиль ва бир пиёдани уриб кетди.
Тошкент шаҳар Шайхонтоҳур тумани ТҲАЙ кўчасида ўз йўналишида ҳаракатланиб келаётган Nexia-3 йўлидан Spark чиқиб қолиши сабаб рулни кескин чапга бурган. Шундан сўнг мазкур йўналишнинг чап тарафида келаётган яна бир Nexia-3 билан тўқнашган.
Автомобиль руль бошқарувини йўқотиб, йўлни иккига ажратиб турувчи яшил майдонда турган пиёдани урган ва қарама–қарши йўналишда келаётган «ВАЗ» автомашинаси билан тўқнашган.
Оқибатда пиёда воқеа жойида вафот этган.
«ВАЗ» ҳайдовчиси ва унинг икки йўловчиси ҳам тан жароҳати олиб шифохонага ётқизилган.
Ҳолат юзасидан Жиноят кодексининг 266-моддаси 2-қисми (одам ўлимига сабаб бўлган транспорт бошқариш хавфсизлиги қоидаларини бузиш) билан жиноят иши қўзғатилган.
Сергелида «ВАЗ» бошқарувни йўқотиб темир устунга урилди.
Сергели тумани Янги Сергели кўчасида ҳаракатланиб келаётган «ВАЗ-2106» бошқарувни йўқотиб йўл четидаги темир устунга бориб урилган.
Оқибатда ҳайдовчи воқеа жойида вафот этган, йўловчи тан жароҳати олиб шифохонага ётқизилган.
Йўловчининг маълум қилишича, ҳайдовчи соғлиғи ёмонлашгани сабаб бошқарувни йўқотган. Ҳозирда терговга қадар текширув ҳаракатлари олиб борилмоқда.
Паркентда юк машинаси Lacetti ва Spark устига ағдарилди.
Дастлабки маълумотларга кўра, 2021 йил 15 декабрь куни соат 16:00 ларда, Тошкент вилояти, Паркент тумани ҳудудидан ўтган 4Р-15 Қизилтоғ–Паркент–Янгибозор автомобиль йўлининг 56-километрида ҳайдовчи Ж.Н. (1998 йилда туғилган) Howo юк машинасида ҳаракатланаётиб бурилишда бошқарувни йўқотган ва транспорт воситаси устига ағдарилган.
Ағдарилиш жараёнида йўл четида тўхтаб турган Lacetti ва Spark автомобилларига техник шикаст етган (автомобиль салонида фуқаролар бўлмаган).
ЙТҲ натижасида ҳайдовчига биринчи тез тиббий ёрдам кўрсатилган.
Мазкур ЙТҲ юзасидан Паркент тумани ИИБ ЙҲХБ ходимлари томонидан суриштирув олиб борилмоқда.
Изоҳ (0)