«У ерда на кўмир ва на газ бор, шунчаки чиринди тутаган». Масъуллар Чироқчида ернинг чўғ бўлиб ёнишига изоҳ берди

Интернетда Қашқадарё вилоятининг Чироқчи туманидаги «Хўжа Абдужаббор» қишлоғида ер чўғ бўлиб ёнаётгани айтилган видео тарқалди. Ҳолатни изоҳлаган вилоят Экология бошқармаси чўғ ер остида қолиб кетган қамишлар қизиши ва чириши натижасида юзага келганини билдирди.

«Дарё» мухбири воқеа тафсилотларини ўрганди.

Маълум бўлишича, Чироқчи туманининг «Хўжа Абдужаббор» қишлоғида яшовчи фуқаро Ҳасан Нақшбандов ҳовлисида мазкур ҳолат кузатилгач, қўшниси ёмғирдан сўнг ернинг тутаётганини кўриб, ҳолатни телефонига тасвирга олган ва интернетда тарқатган.

«Ўша куни ёмғир ёғганди. Қўшнимиз ернинг парланаётганини кўриб, ҳолатни телефонига ‘съёмка’ қилган ва интерентда тарқатган. Бу эса ижтимоий тармоқда ваҳимани келтириб чиқарди. Аслида ҳеч нарса бўлгани йўқ. Биз шу ерда яшаяпмиз», — дейди Ҳасан Нақшбандов.

Мазкур ҳолатни ўрганган вилоят Фавқулодда вазиятлар бошқармаси, вилоят Экология бошқармаси ҳамда Чироқчи туман ҳокимлиги масъуллари ҳам интернетда тарқалган ваҳималар асоссиз эканини, қўрқишга асос йўқлигини айтмоқда.

Ҳолатни воқеа жойига бориб ўрганган геолог Маҳмадиёр Шодиқуловнинг аҳоли вакилларига таяниб, маълумот беришича воқеа жойи аввал қамишзор, чакалакзор бўлган.

«Кекса ёшли аҳоли вакилларининг айтишича, бу жой чакалакзор, қамишзор ва дарахтзор бўлган. Йиллар давомида қамиш ва дарахтлар ўсган қуриган, яна ўсган ва қуриган. Натижада унинг жойида чўкинди ҳосил бўлган. Геология тилида айтилганда торфга айланган. Аҳоли бу жойда ўсган малинани ёқиши оқибатида ерга яқин турган торф ёнган ва шу ҳолат юзага келган», — дейди Маҳмадиёр Шодиқулов.

Геологнинг айтишича, торфларнинг ёниши давом этган. Шу боис, мутахассислар туташни тўхтатиш мақсадида ерни ковлаб, тутаётган жойни тупроқ билан кўмган ва туташнинг давом этишини тўхтатган.

«Маҳаллий аҳолига хавф туғдирмаслиги учун ўртани эксковатор билан ковлаб, ёнишни, туташни тўхтатдик. Биз бу ердан намуналар олдик, буни текшириб кўриб, якуний хулосани айтамиз», — дейди Маҳмадиёр Шодиқулов.

Вилоят Фавқулодда вазиятлар бошқармаси бошлиғи ўринбосари Нодир Абдуллаевнинг айтишича, туташ содир бўлган жойда ҳеч қандай кўмир, газ ёки шунга ўхшаш қазилмалар йўқ.

«Ижтимоий тармоқларда ваҳима қилинганидек, бу ерда кўмир ёки газ сизиб чиқиш ҳолатлари йўқ. Бу ерда фақат чиринди ёниб, туташ ҳосил бўлган. Ваҳимага ўрин йўқ», — дейди Нодир Абдуллаев.