Қарши шаҳридаги «Шодлик» маҳалласида жойлашган 2-сонли ётоқхона хароба аҳволда экани, вилоят ва шаҳар ҳокимлиги ҳолатга эътибор қаратмаётгани хабар берилганди. Шундан сўнг вилоят ҳокимлиги мазкур шикоятга эътибор қаратиб, ётоқхона тадбиркорга тегишли мулк эканини ёзди ва тадбиркорлик субъектида давлат маблағлари ҳисобидан таъмирлаш ишларини олиб бориш қонунга зид эканини таъкидлади.
«Дарё» мухбирининг хабар беришича, 2021 йилнинг 13—14 декабрь кунлари мазкур ётоқхонада ҳомийлар ҳисобидан таъмирлаш ишлари бошлаб юборилган.
«Ётоқхонада яшаётган фуқароларни совуқ об-ҳавода кўчада қолдириб бўлмаслигини ҳисобга олиб, ҳомий тадбиркор ва раҳбарларни жалб қилган ҳолда ётоқхонани таъмирлаб, фуқароларга шарт-шароит яратиб беришни мақсад қилдик. Аммо эсдан чиқармаслик керакки, мазкур ётоқхона хусусий мулк, шу сабабли ётоқхонани бюджетдан маблағ ажратиб таъмирлаб бўлмайди. Қолаверса, ётоқхонада яшовчиларга маҳаллий ҳокимликлар томонидан имконият яратиб берилгач, улар бу ётоқхонани тарк этади. Уларга уй-жой қилингунга қадар эса биз имконият яратиб беришга қарор қилдик», — дейди «Дарё» мухбири билан суҳбатлашган Қарши шаҳар ҳокими Нормўмин Холбоев.
Шаҳар ҳокимининг тахминий ҳисоб-китобларига кўра, мазкур ётоқхона таъмирига 200-300 миллион сўм маблағ сарфланиши мумкин.
«Маблағ ҳомийлар ҳисобидан бўлгани боис, биз таъмир учун сарфланаётган маблағнинг аниқ суммасини айтолмаймиз. Кимдир бўёқ олиб келган, яна кимдир дераза ромларини олиб келиб, чин кўнгилдан саховат қилмоқда», — деди Нормўмин Холбоев.
Қарши шаҳар ҳокимининг тан олишича, мазкур ётоқхона муаммоси 2020 йил карантин пайтида ҳам кун мавзусига айланган бўлиб, ўша пайтдаги вилоятнинг собиқ ҳокими Зоир Мирзаев томонидан шаҳар ва туман ҳокимларига ҳудудлардан келиб ётоқхонада қўним топган фуқароларни ўз жойига қайтариб, уларнинг бошпанали бўлиши учун зарур ёрдам кўрсатилиши кераклиги, шунингдек ҳокимларга бошпанасиз фуқароларни «вилоят ҳокимлигидан ёрдам берилади», дея Қарши шаҳрига жўнатавермаслик лозимлиги ҳақида топшириқ берилган. Бироқ бу топшириқ шунчаки айтилган ва ўша жойида қолган.
Қарши шаҳар ҳокимининг қўшимча қилишича, таъмирлаш давомида ётоқхонанинг иситиш тизими, канализация муаммоси ва ичимлик суви билан боғлиқ муаммолари ҳам ҳал этилиб, ётоқхона олдида болалар майдончаси барпо этилади.
«Дарё» мухбирининг аниқлаштиришича, вилоятнинг айни кундаги ҳокими Муроджон Азимов ҳам худди Зоир Мирзаев каби дастлаб ётоқхонадаги фуқароларни шаҳар ва туман ҳокимлари ёрдамида бошпанали қилишни мақсад қилган ва Қарши, Қамаши, Касби, Косон ва Нишон тумани ҳокимларига бу ҳақда топшириқ берган.
«Дарё» мухбири вилоятнинг собиқ ҳокими Зоир Мирзаевнинг топшириғи ўз вақтида бажарилмагани сабаби ҳамда амалда ҳоким топшириғи қай даражада адо этилаётганини билиш мақсадида масъуллар билан мулоқот қилишга уринди. Қамаши тумани ҳокимлиги ахборот хизмати раҳбари Нурбек Расулов мухбирнинг вилоятнинг собиқ ҳокими топшириғи бажарилмагани сабаби ва айни кунда вилоятга раҳбарлик қилаётган Муроджон Азимовнинг топшириғи қай даражада бажарилаётганини ойдинлаштиришга оид саволини очиқ қолдирган бўлса, Нишон тумани ҳокимлиги ахборот хизмати масъули хароба ётоқхонада нишонлик фуқаролар йўқлигини билдирди.
Бу ҳақда «Дарё» мухбири билан мулоқот қилган Касби тумани ҳокимлиги ахборот хизмати раҳбари Гулилайло Тугалова эса ҳоким Тўхтамурод Мейлиев аслида касбилик бўлган икки нафар аёл билан Зоир Мирзаев топшириқ берган пайтдаёқ суҳбатлашиб, уларни Касби туманига қайтариш ва уй-жой билан таъминлаш чорасини кўрганини айтмоқда.
«Аммо ҳар икки аёл ҳам ҳокимга Касби туманига қайтмаслигини айтиб, таклифни рад этган», — дейди Гулилайло Тугалова.
Касби тумани ҳокимлигининг матбуот котиби Гулилайло Тугаловага кўра, вилоятнинг амалдаги ҳокими Муроджон Азимов томонидан берилган топшириқдан сўнг бу масала яна кун тартибига чиққан. Ва касбилик масъуллар икки нафар аёлни туманга қайтариш мақсадида яна улар билан суҳбатлашган.
Аниқланишича, айни кунда мазкур ётоқхонадаги 62 та хонада 158 нафар фуқаро истиқомат қилади.
Эслатиб ўтамиз, аввалроқ мазкур ётоқхона аҳволи жамоатчиликка ошкор бўлиб, одамларни ташвишга солгач, вилоят ҳокимлиги ахборот хизмати масъуллари ҳолатга эътибор қаратган. «Тез кунларда ким уй-жойга муҳтож, кимнинг уй-жойи борлиги ўрганилиб, ҳар бири бўйича охирги хулосалар берилади. Шунга қараб бинода яшаб келаётган уй-жойи бўлмаган фуқароларни келгусида турар жойлар билан таъминлаш чоралари кўрилади. Туманлардан келиб бинога жойлашиб олган фуқаролар аввалги яшаш манзилларига қайтарилади. Барча фуқаролар муаммоси тегишли тартибда ҳал этилганидан сўнг бино тадбиркорга бўшатиб берилади», — деганди.
Изоҳ (0)