Ўзбекистонда трактор ишлаб чиқариш ҳажми 2 йилда қарийб беш баравар қисқарган

Ўзбекистонда 2021 йилнинг дастлабки 10 ойида 213 та трактор ишлаб чиқарилди. Бу ҳақда Давлат статистика қўмитаси хабар қилди.

Маълум қилинишича, трактор ишлаб чиқариш ҳажми ўтган йилнинг мос даври билан солиштирганда 66,2 фоизга камайган. 2020 йилнинг январь—октябрь ойларида 630 дона трактор ишлаб чиқарилганди. Кўрсаткич 2019 йилнинг кўриб чиқилаётган даврида 1194 тани ташкил этган.

Аввалроқ 2021 йилнинг январь—июнь ойларида жами 173 дона трактор ишлаб чиқарилгани, бу 2020 йилнинг мос даврига нисбатан 72,5 фоизга камлиги хабар қилинганди.

Бундан ташқари, 2021 йилнинг ойида 8 та хорижий давлатга қиймати 11,5 миллион долларлик 714 та юк автомобиллари экспорт қилинган. Юк автомобиллари экспорти ўтган йилнинг мос даври билан солиштирилганда 37 тага камайган.

Ўзбекистон 10 ойда юк автомобилларини энг кўп экспорт қилган давлатлар:

• Қозоғистон — 505 та;
• Қирғизистон — 84 та;
• Сингапур — 71 та;
• Афғонистон — 29 та.