Тошкент шаҳри Чилонзор туманида таом етказиб берувчи акасини ҳимоя қилиш мақсадида қасддан одам ўлдирган йигитга суд ҳукми ўқилди, деб хабар бермоқда Олий суд.
Маълум қилинишича, уйига овқат буюртма қилган аёлнинг телефон рақамига етказиб бериш ходимидан SMS хабар келган: «Сомсангиз тайёр». Бироздан сўнг эса худди шу рақамдан «Фарзандларингиз борми?» деган яна бир хабар жўнатилган.
Қайд этилишича, аёлнинг телефонига келган хабарни ўқиган эрнинг жаҳли чиққан ва бегона рақамга қўнғироқ қилиб, учрашув жойини белгилаган.
У жўнатилган хабарни аниқлаштириш мақсадида 14 август соат 17:30 атрофида хотини, икки фарзанди, онаси ва жияни билан келишув жойига борган. Учрашув пайтида таом етказиб берувчи йигитга укаси ҳамроҳ бўлиб келган ва унинг ёнидаги ошхона пичоғи бўлган.
«Ўғлим унга қараб ‘Сен хотинимга SMS ёзган экансан. Қани, менга хотинингнинг номерини ташла, мен ҳам ёзаман шунақа’, деган. Йигитчилик учун қилди у бу ишни», — деган марҳумнинг онаси суд залида.
Орада жанжал чиққан ва таом етказиб берувчи йигитнинг укаси эркакка бир марта ошхона пичоғи билан зарба берган. Таъкидланишича, воқеа содир бўлгандан кейинги ака-ука ўртасидаги ёзув стенограмма орқали қоғозга туширилган. Аниқланишича, йигит пичоқни акасига айтмасдан олиб келган.
Қайд этилишича, унга нисбатан Жиноят кодексининг 97-моддаси «ж» қисми билан 12 йил муддатга озодликдан маҳрум қилиш жазоси тайинланган.
Изоҳ (0)