Бутун дунё ёшлари глобал иқлим ўзгаришлари сабаб инсониятнинг келажагини пессимистик баҳолаб, ҳукуматлар ушбу муаммони ҳал этиш учун етарлича чора кўрмаяпти деб ҳисобламоқда. Бу ҳақда The Lancet Planetary Health илмий журналида эълон қилинган тадқиқот натижаларида сўз боради, деб хабар беради «Интерфакс».
Сўровда Австралия, Бразилия, Буюк Британия, Ҳиндистон, Нигерия, Португалия, АҚШ, Филиппин, Финляндия ва Франциядан бўлган 16-25 ёш оралиғидаги 10 минг респондент иштирок этган. Тадқиқот ўз ичига Стенфорд университети мутахассисларини олган халқаро олимлар жамоаси томонидан май—июнь ойлари ўтказилган.
Респондентларнинг қарийб 60 фоизи иқлим ўзгаришидан «жуда» ёки» «фавқулодда» хавотирда эканини кўрсатган, 45 фоизи эса ушбу масала бўйича ҳис-туйғулари кундалик ҳаётларига таъсир қилаётганини билдирган. Сўров иштирокчиларининг салкам учдан икки қисми ўз ҳукуматлари иқлим фалокатларини бартараф этиш бўйича етарлича чора кўрмаяпти деган бўлса, 58 фоиз респондент ҳукуматлар «менга ва/ёки келажак авлодга хиёнат қиляпти», дея ҳисоблаган.
Сўров иштирокчиларининг тўртдан уч қисми келажакдан хавотирда эканликларини тан олган, 56 фоизи эса «инсониятнинг ҳалокати муқаррар» деб ҳисоблаган.
«Фарзандларимизнинг хавотирлари, ўз ҳукуматлари томонидан кўрилаётган иқлим ўзгаришига адекват жавоб бермаётганини ҳисобга олсак, мутлақо оқилона жавобдир», — дейди тадқиқот муаллифларидан бири, Бат университети вакили Керолайн Хикман.
Аввалроқ ЖССТ 15 йил ичида биринчи марта ҳаво сифати бўйича тавсияларини кучайтиргани тўғрисида хабар берилганди. Ҳаво ифлосланишидан йилига 7 миллион киши вафот этади — бу чекиш оқибатидаги ўлим даражасига яқиндир. Канада ва Британия олимлари гуруҳи томонидан ўтказилган тадқиқотларга кўра эса иқлим ўзгаришлари сабаб Ер 500 йилдан сўнг яшаш учун яроқсиз ҳолга келиб қолади.
Изоҳ (0)