Россия президенти Владимир Путин ва Буюк Британия бош вазири Борис Жонсон ўзаро телефон орқали мулоқот қилди. Бу ҳақда Кремль матбуот хизматига таяниб, Meduza хабар берди.
Маълум қилинишича, Путин «Киевнинг деструктив чизиғи» бўйича мисоллар келтирган, шунингдек, у Украина ҳукумати Донецк халқ республикаси (ДХР) ва Луганск халқ республикаси (ЛХР) чегараларидаги вазиятни атайлаб мураккаблаштираётгани ҳамда рус тилида сўзлашувчиларни дискриминация қилиш бўйича сиёсат юритаётганини таъкидлаган.
Жонсоннинг матбуот хизмати эса ўз навбатида, суҳбат давомида Британия бош вазири Россия қўшинларининг Украина чегарасига тўпланаётганидан хавотирда эканини билдирганини ва «ҳар қандай беқарорлаштирувчи ҳаракат жиддий оқибатларга олиб келиши мумкин бўлган стратегик хатога айланиши»дан огоҳлантиргани ҳақида ёзган.
Ғарбда сўнгги бир неча ҳафтадан буён Украина чегарасида Россия қўшинлари тўпланаётгани тўғрисидаги гапирилмоқда. Россия мамлакат ҳудуди бўйлаб қўшинларнинг кўчирилиши — мутлақо ўзининг ички иши эканини қайд этяпти.
Украина атрофида вазият Путин ва АҚШ президенти Жо Байден ўртасида 7 декабрь куни ўтказилган видеоалоқа суҳбатининг асосий мавзуси бўлганди. G7 давлатлари 12 декабрь куни Россиянинг Украинага ҳужуми «қимматга тушиши» ва ўз ортидан «улкан оқибатларни» юзага келтириши мумкинлиги тўғрисида қўшма баёнот берган.
Изоҳ (0)