Ижтимоий тармоқларда икки нафар аёлнинг профилактика инспекторлари билан жанжаллашгани тасвирланган видео тарқалди. Тошкент шаҳар ИИББ мазкур ҳолатга муносабат билдириб, тўпланган ҳужжатлар прокуратурага юборилганини маълум қилди.
Ижтимоий тармоқларда пойтахтнинг Чилонзор туманида фоҳишалик билан шуғулланишда гумон қилинган икки нафар аёлнинг профилактика инспекторлари билан жанжаллашаётгани акс этган видео тарқалди. Видеодан кўриш мумкинки, аёллардан бири инспекторни «ҳароми» дея ҳақорат қилиб, «орқасидан пичоқ уришини» айтиб таҳдид қилгани, сўнг унинг столи устидаги нарсаларни, хусусан, компьютерини отиб юборгани тасвирланган.
«Видеодаги аёллар қайсидир судьянинг уйида ишчи бўлиб ишлашар экан. Аёлларни қўлга олган маҳалла инспекторлари эса қамоқда ушланаётгани айтилмоқда», — дейилади эълон қилинган видео изоҳида.
Содир бўлган ҳолатга алоқадор инспектор капитан И.М.нинг онаси видеомурожаат билан чиқиб, мазкур воқеадан сўнг, унинг фарзандини қамаб қўйишганини, ёрдам сўраб қилган мурожаатлари жавобсиз қолаётганини маълум қилган.
Пойтахт ИИББнинг маълум қилишича, мазкур ҳолат юзасидан хизмат текшируви ўтказилган ва текширув якуни бўйича тўпланган ҳужжатлар фуқаролар Ш.Х., Н.С. ва профилактика инспекторлари И.М., Ш.П.нинг ҳаракатларига қонуний баҳо бериш учун Чилонзор тумани прокуратурасига юборилган. «Барча иштирокчиларнинг ҳаракатларига ҳуқуқий баҳо берилади», — дея қайд этилади муносабатда.
Пойтахт ИИББ ҳам ўз муносабатида инспекторларнинг чиндан ҳам қамоқдами ёки йўқлигига изоҳ бермаган.
Аввалроқ Бухорода 50 минг сўм эвазига уйида фоҳишахона ташкил қилган 62 ёшли аёл қилмиши фош этилгани, Гулистонда танишини Россияга фоҳишалик қилишга жўнатмоқчи бўлган шахс қўлга олингани, Тошкент аэропортида уч нафар аёл Туркияга фоҳишаликка юборилаётганда тўхтатиб қолингани тўғрисида хабар берилганди.
Изоҳ (0)