Ўзбекистондаги тижорат банкларида доллар курси биринчи марта 10 860 сўмгача кўтарилди

Ўзбекистондаги бир нечта тижорат банклари 13 декабрь, душанба куни доллар валютасининг сўмга нисбатан курсини оширди.

Аксарият банклар 1 АҚШ долларини 10 755—10 810 сўмга сотиб олишни, 10 860 сўмга сотишни таклиф қилмоқда. Spot валюта айирбошлаш учун энг ҳамёнбоп банклар рўйхатини келтирди.

Унга кўра, доллар энг арзон нархда сотилаётган банклар «Aloqabank», «Asia Alliance Bank» ва «Trastbank» бўлиб, 1 доллар учун 10 830 сўм этиб белгиланган. Энг мақбул харид нархи эса «Invest Finance Bank», «Poytaxtbank» ва «Капиталбанк» томонидан 10 810 сўмга оширилган курс бўйича таклиф қилинмоқда.

Эслатиб ўтамиз, 10 декабрь, жума куни доллар ўзининг максимал қийматини янгилаган эди. Ўшанда банклараро курс 10 850 сўмгача кўтарилган.

Марказий банк маълумотларига кўра, 2021 йилнинг январь—октябрь ойларида сўм атиги 2 фоизга қадрсизланган. Йиллик ставка эса сўнгги бир неча йил ичида энг паст дажарада қолмоқда — ҳозир у 3 фоизни ташкил қилади.

Қайд этилишича, 2022 йилда Ҳисоб палатаси долларнинг йиллик ўртача курсини 11 300 сўм деб прогноз қилган.

Доллар курси ноябрь ўрталаридан бошлаб кескин ўсишни бошлаган. 29 ноябрь куни 10 830 сўмга қадар, 30 ноябрь куни 10 840 сўмга қадар кўтарилганди. Марказий банк 13 декабрдан хорижий валюталарнинг ўзбек сўмига нисбатан янги қийматини белгилади. Унга кўра, долларнинг расмий курси 11,75 сўмга кўтарилиб, 10 807,48 сўмни ташкил қилди.