Шавкат Мирзиёев ташаббуси билан қабул қилинган «Яшил макон» миллий дастурини амалга ошириш доирасида Ташқи ишлар вазирлиги томонидан Тошкент вилоятидаги «Амирсой» тоғ-чанғи мажмуаси ҳудудида «Дипломатлар боғи»ни ташкил этиш масаласи ишлаб чиқилди, деб хабар бермоқда вазирлик матбуот хизмати.
Қайд этилишича, 10 декабрь куни ТИВ раҳбарияти, хорижий давлатларнинг Тошкент шаҳрида аккредитациядан ўтган дипломатик муассасалари ва халқаро ташкилотлар ваколатхоналари раҳбарлари иштирокида кўчат ўтқазиш маросими бўлиб ўтди.
«Тадбирда хорижлик иштирокчилар томонидан Ўзбекистонда табиатни муҳофаза қилишни кучайтириш, биологик хилма-хилликни сақлаш ва яшил ҳудудларни кўпайтириш борасида амалга оширилаётган ишлар юксак баҳоланди», — дейилади вазирлик хабарида.
Хабарга кўра, бундан бир кун олдин ТИВ раҳбарияти, хорижий давлатларнинг Тошкентда аккредитациядан ўтган дипломатик муассасалари ва халқаро ташкилотлар ваколатхоналари раҳбарлари иштирокида давра суҳбати бўлиб ўтди.
Тадбирда халқаро майдонда Ўзбекистоннинг янги қиёфасини шакллантиришнинг концептуал масалалари юзасидан атрофлича фикр алмашилган, мамлакат ташқи сиёсий фаолиятининг замонавий йўналишлари ва асосий устуворликлари, шунингдек, сўнгги йилларда ташқи сиёсат соҳасида амалга оширилган ишлар якунлари ва натижалари муҳокама қилинган.
Изоҳ (0)