Ijtimoiy tarmoqlarda ikki nafar ayolning profilaktika inspektorlari bilan janjallashgani tasvirlangan video tarqaldi. Toshkent shahar IIBB mazkur holatga munosabat bildirib, to‘plangan hujjatlar prokuraturaga yuborilganini ma’lum qildi.
Ijtimoiy tarmoqlarda poytaxtning Chilonzor tumanida fohishalik bilan shug‘ullanishda gumon qilingan ikki nafar ayolning profilaktika inspektorlari bilan janjallashayotgani aks etgan video tarqaldi. Videodan ko‘rish mumkinki, ayollardan biri inspektorni “haromi” deya haqorat qilib, “orqasidan pichoq urishini” aytib tahdid qilgani, so‘ng uning stoli ustidagi narsalarni, xususan, kompyuterini otib yuborgani tasvirlangan.
“Videodagi ayollar qaysidir sudyaning uyida ishchi bo‘lib ishlashar ekan. Ayollarni qo‘lga olgan mahalla inspektorlari esa qamoqda ushlanayotgani aytilmoqda”, — deyiladi e’lon qilingan video izohida.
Sodir bo‘lgan holatga aloqador inspektor kapitan I.M.ning onasi videomurojaat bilan chiqib, mazkur voqeadan so‘ng, uning farzandini qamab qo‘yishganini, yordam so‘rab qilgan murojaatlari javobsiz qolayotganini ma’lum qilgan.
Poytaxt IIBBning ma’lum qilishicha, mazkur holat yuzasidan xizmat tekshiruvi o‘tkazilgan va tekshiruv yakuni bo‘yicha to‘plangan hujjatlar fuqarolar Sh.X., N.S. va profilaktika inspektorlari I.M., Sh.P.ning harakatlariga qonuniy baho berish uchun Chilonzor tumani prokuraturasiga yuborilgan. “Barcha ishtirokchilarning harakatlariga huquqiy baho beriladi”, — deya qayd etiladi munosabatda.
Poytaxt IIBB ham o‘z munosabatida inspektorlarning chindan ham qamoqdami yoki yo‘qligiga izoh bermagan.
Avvalroq Buxoroda 50 ming so‘m evaziga uyida fohishaxona tashkil qilgan 62 yoshli ayol qilmishi fosh etilgani, Gulistonda tanishini Rossiyaga fohishalik qilishga jo‘natmoqchi bo‘lgan shaxs qo‘lga olingani, Toshkent aeroportida uch nafar ayol Turkiyaga fohishalikka yuborilayotganda to‘xtatib qolingani to‘g‘risida xabar berilgandi.
Izoh (0)