Ички ишлар вазири матбуот котиби Шоҳрух Ғиёсов 2020 йил апрель ойидаги карантин вақтида Қашқадарёнинг Муборак туманида ўтказилган тўй ҳақидаги ахборотни рад этиб, жамоатчиликни чалғитишга уринган вилоят ИИБ ахборот хизматининг хатти-ҳаракатини қоралади. Бу ҳақда Қарши шаҳрида Шоҳрух Ғиёсов иштирокидаги матбуот анжуманида сўз борди, дея хабар берди «Дарё» мухбири.
Мулоқот давомида 2020 йилнинг апрелида вилоятнинг Муборак туманида шифокорлар оиласи карантинга амал қилмай тўй қилгани ҳақида хабарни рад этган вилоят ИИБ ахборот хизматининг собиқ раҳбарига қандай чора кўрилгани сўралди.
«Мазкур хабар жамоатчиликка ошкор бўлгач, вилоят ИИБ ахборот хизматининг собиқ раҳбари Ирода Расулова ҳамда ‘Севимли’ канали мазкур хабарни рад этиб, тўй бўлгани ҳақида хабар тарқатган Муборак тумани ҳокимлигининг собиқ ахборот хизмати раҳбари Зафар Жўраевнинг туман ИИБда сўроқ бераётганини билдирганди. ‘Дарё’ мухбири мазкур ҳолатни охиригача ўрганиб, ҳақиқатан ҳам карантинда тўй қилинганини, шу боис ҳам тўй қилган шифокорлар оиласи жаримага тортилганини ошкор қилди.
Демак, ўша пайтда телеканал мухбири билан ҳамкорлик қилган вилоят ИИБ ахборот хизмати жамоатчиликни чалғитиб, ёлғон ахборот тарқатган бўлиб чиқди. Хўш, бунинг учун ИИБ матбуот котибига чора кўрилдими?», — дея савол берди журналист-блогер Ўралжон Камолов.
Шоҳрух Ғиёсов карантинда тўй ўтказилгани ҳақидаги ахборотга рад жавоб бериш ва бу ҳақда хабар тарқатган матбуот котибининг ИИБда сўроқ қилинаётганини жамоатчиликка кўрсатиш вилоят ИИБ ахборот хизматининг ўша пайтдаги раҳбари Ирода Расуловага тегишли ташаббус эканини билдирди. Унинг хатти-ҳаракати тарихда тизимнинг айби сифатида қолганини ҳам тан олди. Бироқ унга чора кўрилган ёки кўрилмаганини очиқ қолдирди.
«Бу ахборот хизмати раҳбарининг шахсий ташаббуси бўлган. Бу ҳақда менга ҳам ўша пайтда айтишиб, ‘шу ҳақда ўрганамиз’ деганди. Ахборот хизмати раҳбарининг бундай ташаббус билан чиқиши яхши, албатта. Лекин бу бизнинг ўша пайтдаги хатомиз бўлиб қолди. Аслида биз ишга умумий баҳо берилганидан кейин ахборот беришимиз керак бўлади. Ўша пайтда эса вилоят ИИБ ахборот хизмати воқеага тўлиқ ҳуқуқий баҳо берилмасдан аввал бу ҳақда телевидениеда ахборот берган ва хато қилган», — деди Шоҳрух Ғиёсов.
Эслатиб ўтамиз, «Дарё»да 2020 йил 15 апрель куни вилоятнинг Муборак туманида карантинга амал қилмаган шифокорлар 2020 йил 14 апрель куни тўй қилгани ҳақида хабар берилганди. Мазкур хабар ортидан вилоят ИИБ ахборот хизмати билан ҳамкорликда лавҳа тайёрлаган «Севимли» каналининг «Замон» информацион дастури мухбири тўй бўлгани ҳақидаги хабарни рад этишга уринганди «Дарё» мухбири суриштирувларига кўра, тўй қилган шифокорларнинг айби аниқланиб, жаримага тортилгани ошкор бўлди.
Изоҳ (0)