Россия президенти Владимир Путин 1990 йилларда шахсий ҳайдовчи бўлиб ишлаганини тан олди. Бу ҳақда у «Яқин тарих» фильмига киритилган интервьюсида айтиб ўтган. Фильмдан парчалар «Россия 24» телеканалида намойиш этилган.
«Баъзида ҳайдовчилик билан қўшимча пул ишлашга тўғри келарди. Бу ҳақда гапириш ёқимсиз, лекин, афсуски, шундай бўлган», — деди Путин.
2018 йилда у «Путин» фильми учун Россия давлат телерадиокомпаниясининг сиёсий кузатувчиси, Путиннинг сайловолди штаби матбуот котиби Андрей Кондрашовга берган интервьюсида 1990 йилларда ҳайдовчи бўлиб ишлаш ҳақида ўйлагани, бунга тайёр ҳам бўлганини айтганди.
Путиннинг сўзларига кўра, бундай фикрлар унинг хаёлига мэр Анатолий Собчак губернаторлик сайловларида мағлуб бўлганидан кейин келган (Путин сайловолди штабини бошқарган эди). «Нима қилиш ҳақида ўйладим, балки ҳайдовчилик қилса бўлар? Ҳазиллашмаяпман, қаерга борардим. Икки болам ёш», — деган президент.
«Шунинг учун менга Москвага кўчиб ўтишни ва президент ишлари бошқармасида юридик ишлар билан шуғулланишни таклиф қилишганида, рози бўлдим ва келдим», — дея қўшимча қилган Путин.
«Яқин тарих» фильмида Путин, шунингдек, 1990 йилларда ҳукуматда ишлаган маслаҳатчилар орасида АҚШ Марказий разведка бошқармасининг камида бир ходими бўлгани ҳақида гапирди. Бундай кишилар маслаҳатчилар орасида, эҳтимол, битта эмасди, аммо улардан бири, аниқ АҚШ Марказий разведка бошқармаси ходими эди, ўз мамлакати қонунларига кўра, унда тижорий фаолият билан шуғулланиш ҳуқуқи йўқ эди. Охир-оқибат, иш суд жараёнигача борди. Ушбу жараёнида у Марказий разведка бошқармасининг ходими экани аниқ бўлди», — дейди Путин.
1990 йилларда Россия ҳукуматида АҚШ Марказий разведка бошқармаси ходимлари ишлагани ҳақида Путин 10 декабрь куни Фуқаролик жамиятини ривожлантириш ва инсон ҳуқуқлари бўйича кенгаш йиғилишида ҳам айтган. Унинг таъкидлашича, 2000 йилларнинг бошида президент бўлганидан кейин «ҳаммасини тозалаб ташлаган».
1970—1980 йилларда Владимир Путин КГБ (Давлат хавфсизлиги қўмитаси) зобити бўлиб, жумладан, Германия Демократик Республикасининг ташқи разведкасида ишлаган. 1990 йилда у СССРга қайтиб, ташқи разведканинг марказий аппаратига ўтишдан бош тортган ва Ленинградда қолган. 1991 йилда Путин КГБдан кетган.
1990 йил май ойида Анатолий Собчак Ленинград шаҳар халқ депутатлари кенгаши раиси этиб сайланганидан кейин Путин унинг маслаҳатчиси бўлган. Кейинчалик Собчак мэр лавозимига сайланди, Путин эса Ленинград мэриясининг ташқи алоқалар қўмитаси раиси лавозимига ўтди.
Путин 1996 йилнинг ёзигача, яъни Собчак сайловларда мағлуб бўлгунга қадар мэрияда ишлаган. Кейин у Москвага ишга таклиф қилинган ва у ерда президент ишлари бошқармаси бошлиғининг ўринбосари лавозимини эгаллаган.